तुइन खोलामा खसेको पहिरो पन्छाएपछि नारायणगढ–मुग्लिन सडकखण्ड सञ्चालनमा

काठमाडौं । चितवनको इच्छाकामना गाउँपालिका–५ स्थित तुइन खोलामा खसेको ठूलो पहिरोका कारण अवरुद्ध बनेको नारायणगढ–मुग्लिन सडकखण्ड पुनः सञ्चालनमा आएको छ । सडक डिभिजन कार्यालय भरतपुरका अनुसार बिहीबार राति १०ः३५ बजेदेखि सडक दुईतर्फी रूपमा खुलाइएको हो ।

उक्त सडकखण्ड यही असोज ७ गते मंगलबार साँझ करिब ४ः३० बजेबाट पूर्णरूपमा अवरुद्ध भएको थियो । पहिरो हटाउने काम बुधबार बिहान मात्र सुरु गरिएको थियो भने बिहीबार साँझसम्म पनि काम नसकिएपछि फ्लडलाइटको सहायतामा निरन्तर कार्य गरिएको थियो ।

१६० मिटर क्षेत्रमा फैलिएको पहिरो हटाउन पाँच वटा भन्दा बढी डोजर प्रयोग गरिएको थियो । यो सडकखण्डमा निरन्तरको अवरोधले यात्रुहरूलाई गन्तव्यमा पुग्न कठिनाइ भएको थियो ।

काठमाडौंलाई तराईसँग जोड्ने मुख्य लाइफलाइनको रूपमा रहेको यस राजमार्गमा चाडपर्वको समयमा भएको अवरोधले यात्रुहरू सडकमा अलपत्र परेका थिए ।

तुइन खोला नजिक यसअघि पनि पटक–पटक पहिरो खस्ने घटना भएका थिए । यद्यपि, अहिले सडक सञ्चालनमा आएपछि अब पुनः पहिरो नखसे यात्रा सहज हुने अपेक्षा गरिएको छ ।