टिकटकबाट निर्वाचनमा सहभागिताः निर्वाचन आयोगको भिडियो प्रतियोगिता घोषणा

काठमाडौं । रमाइलोका लागि प्रयोग हुँदै आएको टिकटक अब राष्ट्रिय दायित्वसँग जोडिने भएको छ । निर्वाचन आयोगले प्रतिनिधिसभा सदस्य निर्वाचन, २०८२ लाई लक्षित गर्दै टिकटक भिडियो प्रतियोगिता सञ्चालन गर्ने घोषणा गरेको छ । निर्वाचनलाई भव्य, सभ्य र सहभागितामूलक बनाउन सामाजिक सञ्जालमार्फत मतदाता शिक्षा र प्रचारप्रसार गर्ने उद्देश्यले यो अभियान अघि बढाइएको हो ।

आयोगका अनुसार फागुन २१ गतेका लागि तय गरिएको प्रतिनिधिसभा सदस्य निर्वाचनको सन्दर्भमा एक मिनेट अवधिको सन्देशमूलक तथा संवादमूलक टिकटक भिडियो तयार गरी आफ्नो सामाजिक सञ्जालमा पोस्ट गर्नुपर्नेछ । साथै उक्त भिडियो फागुन १७ गतेभित्र आयोगको इमेलमा समेत पठाउनुपर्ने व्यवस्था गरिएको छ ।

प्रतियोगितामा प्राप्त भिडियोमध्ये सबैभन्दा धेरै भ्युज प्राप्त गर्ने तीन उत्कृष्ट भिडियोलाई नगद पुरस्कार प्रदान गरिनेछ । पहिलो हुनेलाई ५० हजार रुपैयाँ, दोस्रोलाई ३० हजार रुपैयाँ र तेस्रोलाई २० हजार रुपैयाँसहित प्रमाणपत्र प्रदान गरिने आयोगले जनाएको छ ।

भिडियोमा निर्वाचनको महत्व, आवश्यकता, मतपत्रमा सही तरिकाले छाप लगाउने प्रक्रिया, निर्वाचन आचारसंहिता पालना, मतदाताको अधिकार र कर्तव्यजस्ता विषय समेटिनुपर्नेछ । साथै मतदाताले कस्तो उम्मेदवार छनोट गर्नुपर्छ भन्ने सन्देशसमेत समावेश गर्न सकिनेछ । भिडियो मौलिक अडियो, अभिनय र प्रस्तुतीकरणसहित तयार पारिएको हुनुपर्नेछ, जसलाई विशेष प्राथमिकता दिइने बताइएको छ ।

एक व्यक्तिले एउटा विषयमा एक भिडियो मात्र पठाउन सक्नेछ भने दुई वा दुईभन्दा बढी व्यक्तिले समूहमा पनि भिडियो निर्माण गर्न सक्नेछन् । प्रतियोगितामा सहभागी सबै भिडियोमाथि आयोगको अधिकार रहनेछ र आयोगले ती भिडियो आफ्ना सामाजिक सञ्जालमार्फत प्रसारण गर्न सक्नेछ । उत्कृष्ट भिडियोको छनोट स्वतन्त्र विज्ञ तथा आयोगको संयुक्त मूल्याङ्कनबाट गरिनेछ ।