रूसको सुदूरपूर्वी क्षेत्रमा ८.७ म्याग्निच्युडको भूकम्प, सुनामीको चेतावनी जारी

काठमाडौं । रूसको सुदूरपूर्वी तटीय क्षेत्रमा बुधबार बिहान शक्तिशाली भूकम्प गएको छ । अमेरिकी भौगर्भिक सर्वेक्षण संस्था (USGS) का अनुसार उक्त भूकम्पको म्याग्निच्युड ८.७ मापन गरिएको हो ।

सुरुमा यसको तीव्रता ८ म्याग्निच्युडको रूपमा सार्वजनिक गरिएको थियो, तर पछि परिमार्जन गरी ८।७ मा अद्यावधिक गरिएको हो । भूकम्पको केन्द्रबिन्दु पेट्रोपाभ्लोभ्स्क–काम्चात्स्की सहरबाट करिब १३६ किलोमिटर पूर्वमा र भुइँबाट १९ किलोमिटर गहिराइमा रहेको बताइएको छ ।

भूकम्पपछि समुद्री छालको जोखिम उच्च भएको भन्दै प्रशान्त सुनामी चेतावनी केन्द्रले सम्भावित ठूलो र खतरनाक सुनामीको पूर्वानुमान गरेको छ । त्यसैअनुसार काम्चात्का प्रायद्वीपमा सुनामीको चेतावनी जारी गरिएको छ ।

काम्चात्काका गभर्नर भ्लादिमिर सोलोदोभले तटीय क्षेत्रमा बसोबास गरिरहेका स्थानीयलाई सुरक्षित स्थानमा जान आग्रह गरेका छन् । प्रारम्भिक विवरणहरू अनुसार हालसम्म कुनै ठूलो क्षति नभएको जनाइएको छ ।

यसैबीच, जापानको मौसम विज्ञान एजेन्सीले पनि आफ्नो तटीय क्षेत्रमा १ मिटरको छाल आउन सक्ने भन्दै सावधानी अपनाउन अनुरोध गरेको छ । जापानी सार्वजनिक प्रसारक NHK का अनुसार जापानका केही भागमा सतर्कता सूचना जारी गरिएको छ ।

भूकम्पको असर अमेरिका सम्म पर्ने सम्भावना रहेको भन्दै हवाई टापुहरू र अलास्काको एल्युसियन द्वीपसमूहमा समेत सुनामीको सम्भावनाबारे पूर्वसूचना जारी गरिएको छ ।

भूकम्पपछि साखालिन टापुका केही बासिन्दाहरूलाई सुरक्षित क्षेत्रमा सार्ने काम पनि सुरु भएको छ । उक्त टापु भूकम्पको केन्द्रभन्दा दक्षिणपश्चिममा पर्छ ।

काम्चात्का प्रायद्वीप प्रशान्त महासागरको ‘रिङ अफ फायर’ नामक क्षेत्रमा पर्छ, जुन विश्वकै सबैभन्दा सक्रिय भूकम्पीय र ज्वालामुखीय क्षेत्रहरूमध्ये एक मानिन्छ ।