सरकारद्वारा साउन महिना ‘डेंगी सचेतना महिना’ घोषणा

काठमाडौं । स्वास्थ्य तथा जनसंख्या मन्त्रालयले डेंगी रोगको जोखिम न्यूनीकरणका लागि साउन महिनालाई ‘डेंगी सचेतना महिना’को रूपमा मनाउने घोषणा गरेको छ । बुधबार बिहान आयोजित एक कार्यक्रममा मन्त्रालयले डेंगीबारे जनस्तरमा जानकारी फैलाउन यो निर्णय सार्वजनिक गरेको हो ।

मन्त्रालयले यो वर्ष देशभर ६० हजारभन्दा बढी व्यक्तिमा डेंगी संक्रमण देखिन सक्ने अनुमानसमेत गरेको छ । मन्त्रालय अन्तर्गतको इपिडिमियोलोजी तथा रोग नियन्त्रण महाशाखाले जनस्वास्थ्यको दृष्टिले उच्च जोखिमको रूपमा चिनिँदै आएको डेंगी नियन्त्रण तथा सचेतना अभियानको नेतृत्व गर्नेछ ।

सामान्यतया साउनदेखि कात्तिक महिनासम्म डेंगी संक्रमणको दर उच्च रहने भएकाले साउनको प्रारम्भदेखि नै सावधानी अपनाउनुपर्ने आवश्यकता औंल्याइएको छ ।

स्वास्थ्य मन्त्रालयले देशभरका स्थानीय तहहरू, स्वास्थ्य संस्थाहरू र समुदाय स्तरका अभियानहरू मार्फत डेंगी नियन्त्रणका लागि संयुक्त रूपमा काम गरिने जनाएको छ ।

डेंगी रोकथामका लागि सरसफाइ, लामखुट्टेको उत्पत्ति रोक्ने वातावरण निर्माण, जनशिक्षा तथा जोखिममा रहेका क्षेत्रहरूमा विशेष सतर्कता अपनाउने रणनीति लिइने मन्त्रालयले जानकारी दिएको छ ।

साथै, आम नागरिकलाई आवश्यक सावधानी अपनाउन, स्वास्थ्य समस्या देखिएमा नजिकको स्वास्थ्य संस्थामा सम्पर्क गर्न र समुदायमा जानकारी फैलाउन मन्त्रालयले आग्रह गरेको छ ।