अस्ट्रेलियामा नेपाली टोलीको सानदार पुनरागमन, पहिलो जित दर्ता

काठमाडौं । अस्ट्रेलियामा जारी टप एन्ड ट्वान्टी–२० क्रिकेट शृङ्खलामा नेपालले पहिलो जित हात पारेको छ । चौथो खेलमा नेपालले होबार्ट हरिकेन्स एकेडेमीलाई ६६ रनले पराजित गर्दै प्रतियोगितामा विजय यात्रा सुरु गरेको हो ।

काजालिस एरिना पामस्ट्रनमा टस जितेर पहिले ब्याटिङ गरेको नेपालले निर्धारित २० ओभरमा ७ विकेट गुमाउनुअघि १८० रन बनायो । १८१ रनको लक्ष्य लिएर मैदान उत्रिएको होबार्ट हरिकेन्सको इनिङ १६.१ ओभरमै ११४ रनमा समेटियो ।

जीतमा मुख्य भूमिका निभाउँदा नन्दन यादवले ५ विकेट हात पारे । त्यस्तै, कप्तान रोहितकुमार पौडेल, सन्दीप लामिछाने, कुशल भुर्तेल र रिजन ढकालले समान १–१ विकेट लिए । होबार्टका ब्राड्ली होपले ३१ र चार्ली वाकिमले २८ रन जोडे ।

यसअघि नेपालका लागि आरिफ शेखले ३३, आसिफ शेखले २९, कुशल भुर्तेलले २७, लोकेश बमले अविजित २५, भीम सार्कीले १८ र कप्तान रोहितकुमार पौडेलले ९ रन बनाए । होबार्टका निवेथन राधाकृष्णन र राफ म्याकमिलनले २–२ विकेट लिए ।

नेपाल यसअघि खेलेका तीनै खेल (नर्दर्न टेरिटोरी स्ट्राइकर, बङ्गलादेश ‘ए’ र मेलबर्न स्टार्स एकेडेमी) मा पराजित भएको थियो । नेपाली टोली अब बुधबार मेलबर्न रेनेगेड्स र शुक्रबार पाकिस्तान शाहिन्ससँग प्रतिस्पर्धा गर्नेछ ।