कुनै कारण देखाएर निर्वाचनको मिति सार्ने प्रयास नगर्न प्रचण्डको चेतावनी

काठमान्डु । नेपाली कम्युनिष्ट पार्टी (नेकपा) का संयोजक तथा पूर्वप्रधानमन्त्री पुष्पकमल दाहाल ‘प्रचण्ड’ले सरकारलाई कुनैपनि कारण देखाएर निर्वाचनको मिति सार्ने प्रयास नगर्न कडा चेतावनी दिएका छन् । शनिबार आयोजित पार्टीको एकता सन्देश सभामा सम्बोधन गर्दै उनले निर्वाचन सारिए वा संविधान उल्लङ्घन गरिए आफ्नो पार्टी मौन नबस्ने स्पष्ट पारे ।

प्रचण्डले सरकारले निर्वाचनलाई सहज र शान्तिपूर्ण ढङ्गले सम्पन्न गर्नुपर्नेमा जोड दिँदै, बहाना बनाएर मिति सार्ने दुस्साहस नगर्न आग्रह गरे । उनले संविधान पहिले नै केही हदसम्म मिचिएको उल्लेख गर्दै, देशको असहज अवस्थालाई ध्यानमा राखेर अन्तरिम सरकार गठनमा सहयोग गरिएको स्मरण गराए । तर अब फेरि निर्वाचन धकेल्ने काम भए संविधानमाथि थप आघात हुने र त्यसविरुद्ध कडा प्रतिकार हुने उनले चेतावनी दिए ।

उनले त्याग, निष्ठा र संघर्षको इतिहास नभएकाहरूले अहंकार र दम्भका साथ प्रतिशोधपूर्ण भाषा प्रयोग गरिरहेको आरोप लगाउँदै, यस्तो प्रवृत्तिबाट सचेत रहन खबरदारी गरे । आफ्नो पार्टीको प्राथमिकता शान्तिपूर्ण निर्वाचन भएको पनि उनले बताए ।

प्रचण्डले जनयुद्ध र जनआन्दोलनको शक्तिलाई एकीकृत गर्दै देशलाई संकटबाट जोगाउने उद्देश्यले पार्टी अघि बढेको दाबी गरे । धनगढी, लम्ही, पोखरा, विराटनगर, जनकपुर, मधेस, सुर्खेत हुँदै काठमान्डुसम्म देखिएको जनसहभागितालाई हल्का रूपमा नलिन उनले सरकारलाई चेतावनी दिए । संविधानसँग फेरि खेलबाड गरिए यो शक्ति सडकमा उत्रिने उनको भनाइ थियो ।

निर्वाचनका लागि ६ महिना वा १ वर्ष समय थप्ने हल्लाले देशलाई फेरि दुर्घटनातर्फ धकेल्ने भन्दै, त्यस्तो अवस्थामा नेपाली कम्युनिष्ट पार्टी रमिते नबन्ने प्रचण्डले स्पष्ट पारे । उनले ७७ वटै जिल्ला र सबै पालिकाबाट समाजवादी आन्दोलन र विद्रोहको झण्डा बोकेर सडकमा आउने घोषणा पनि गरे ।

उनले यही शक्तिले दुई सय ५० वर्ष पुरानो राजतन्त्र अन्त्य गरी गणतन्त्र स्थापना गरेको स्मरण गराउँदै, जनशक्तिको तागतलाई खेलाँची नगर्न सरकारलाई कडा सन्देश दिए ।