जसपा नेपालको भूमि विधेयकविरुद्ध देशव्यापी आन्दोलनको घोषणा

काठमाडौं । भूमि सम्बन्धी नयाँ विधेयकको विरोधमा जनता समाजवादी पार्टी (जसपा) नेपालले देशभरि सडक आन्दोलन गर्ने घोषणा गरेको छ । पार्टीका महासचिव लालबाबु राउतले जारी गरेको प्रेस विज्ञप्तिमा भदौ ९ देखि १५ गतेसम्म प्रमुख शहरहरूमा प्रदर्शन गरिने उल्लेख गरिएको छ ।

विज्ञप्तिमा भनिएको छ, ‘भूमि विधेयकप्रति कडा असहमति जनाउँदै यसविरुद्ध व्यापक जनप्रदर्शन गरिने निर्णय भएको छ ।’

जसपाका अनुसार, कृषि, सहकारी तथा प्राकृतिक स्रोत समितिबाट भदौ ५ मा अघि सारिएको विधेयकले सर्वसाधारणभन्दा भू-माफिया र जग्गा दलालहरूको हित संरक्षण गर्ने खतरा बोकेको छ । साथै, विधेयकले तराई–मधेश क्षेत्रमा मरुभूमिकरणको अवस्था सिर्जना गर्ने चेतावनी पनि पार्टीले दिएको छ ।

जसपाले यसअघि आएको भूमि सम्बन्धी अध्यादेशको प्रावधानलाई जस्ताको तस्तै विधेयकमा राखिएको भन्दै निरन्तर आपत्ति जनाउँदै आएको थियो ।