प्रधानमन्त्री ओली आज संसदलाई सम्बोधन गर्दै, विदेश भ्रमणबारे जानकारी दिने

काठमाडौं । प्रधानमन्त्री केपी शर्मा ओलीले आज प्रतिनिधिसभाको बैठकलाई सम्बोधन गर्ने तयारी गरेका छन् ।

नेकपा एमालेका प्रमुख सचेतक महेश बर्तौलाका अनुसार, प्रधानमन्त्री ओलीले दिउँसो १ बजे संसदलाई आफ्नो हालै सम्पन्न स्पेन भ्रमण लगायत समसामयिक विषयमा जानकारी गराउने छन् । उनका अनुसार, प्रधानमन्त्रीको सम्बोधन विशेषगरी कूटनीतिक उपलब्धि, आर्थिक सहकार्यका सम्भावना र नेपालले अन्तर्राष्ट्रिय मञ्चमा प्रस्तुत गरेको दृष्टिकोणबारे केन्द्रित हुने अपेक्षा गरिएको छ ।

प्रधानमन्त्री ओली शुक्रबारर मात्रै छ दिन लामो स्पेन भ्रमणपछि स्वदेश फर्किएका थिए । उनी युरोपेली संघसँगको सम्बन्ध सुदृढ पार्न, प्रविधि तथा पर्यटन क्षेत्रको सम्भाव्यता अध्ययन गर्न र स्पेनको राजधानी म्याड्रिडमा आयोजना भएको एक बहुपक्षीय सम्मेलनमा भाग लिन गएको प्रधानमन्त्रीको सचिवालयले जनाएको छ ।

विदेश भ्रमणपछिको पहिलो संसद सम्बोधनमा उनले नेपालको परराष्ट्र नीति, क्षेत्रीय विकासका प्राथमिकता र सरकारले लिएको आन्तरिक र बाह्य रणनीतिको समन्वयबारे समेत चर्चा गर्ने सम्भावना छ ।