एसईई अब प्रदेशको जिम्मामा, शिक्षा समितिबाट नयाँ प्रस्ताव अनुमोदन

काठमाडौं । माध्यमिक शिक्षा परीक्षा (एसईई) अब प्रदेश तहबाट सञ्चालन गरिने भएको छ । संसद्को शिक्षा समितिले यससम्बन्धी प्रस्ताव पारित गरेसँगै विद्यालय शिक्षा विधेयकअन्तर्गत एसईईको व्यवस्थामा महत्वपूर्ण मोड आएको हो ।

शिक्षा उपसमितिले विधेयकको छलफलका क्रममा एसईई परीक्षा हटाउने सुझावसहित प्रतिवेदन पेश गरेको थियो । तर, शिक्षा मन्त्रालयले उक्त सुझावको प्रतिवाद गर्दै परीक्षा यथावत राख्नुपर्ने धारणा राखेको थियो । मन्त्रालयको विरोधपछि समिति सदस्यहरूले व्यापक छलफल गरे र अन्ततः प्रदेश तहबाट सञ्चालन गर्ने तरिकालाई स्वीकृति दिने निष्कर्षमा पुगे ।

समिति सभापति अम्मरबहादुर थापाले प्रदेशले परीक्षा सञ्चालन गर्ने प्रस्ताव प्रस्तुत गरेका थिए, जसमा अधिकांश सदस्यले समर्थन जनाए । प्रस्तावअनुसार एसईईको सञ्चालन प्रदेश सरकारमार्फत भए पनि राष्ट्रिय परीक्षा बोर्डसँग आवश्यक समन्वय अनिवार्य हुनेछ ।

यसैगरी, प्रस्तावमा प्रदेश कानुनले स्पष्ट व्यवस्था गरेबमोजिम परीक्षा सञ्चालन हुने र त्यस्तो कानुन निर्माण नभएसम्म संघीय कानुनलाई मार्गदर्शनका रूपमा लिइने उल्लेख गरिएको छ ।

शिक्षामन्त्री रघुजी पन्तले एसईईलाई प्रदेशको जिम्मामा दिनु संविधानअनुकूल भएको बताउँदै यसले शिक्षाको गुणस्तर सुधारमा टेवा पुग्ने धारणा व्यक्त गरेका छन् ।