नेपाल ट्रष्टको जग्गा प्रकरणमा पूर्व सह–सचिव लेखबहादुर कार्की पक्राउ

काठमाडौं । दरबारमार्गस्थित नेपाल ट्रष्टको नाममा दर्ता गरिएको जग्गासम्बन्धी ठगी र आपराधिक विश्वासघातको आरोपमा पूर्व सह–सचिव लेखबहादुर कार्कीलाई प्रहरीले पक्राउ गरेको छ ।

प्रहरीका अनुसार, कार्कीले नेपाल ट्रष्ट र थामशेर्क ट्रेकिङ प्रालिबीच भएको लिज सम्झौतामा कानुनी प्रक्रिया उल्लंघन गरी ट्रष्टलाई दीर्घकालीन नोक्सानी हुने गरी सम्झौता गरेको प्रारम्भिक अनुसन्धानले देखाएको छ ।

एसएसपी शिवकुमार श्रेष्ठका अनुसार, सम्झौतामा उल्लेखित कित्ता नं. ४६०६ बाहेक कित्ता नं. ४६०५ समेत बिना संचालक समितिको निर्णय थप गरी मोडेलमा तीन वर्षको निर्माण अवधि र ३० वर्षको लिज सम्झौता गरिएको पाइयो ।

नेपाल ट्रष्टको स्वामित्वमा रहेको जग्गा लिजमा दिने वा लिने प्रक्रियामा कानूनी आधारविना लाभ लिएको आशंकामा कार्कीमाथि ठगी र आपराधिक विश्वासघातसम्बन्धी कसूरमा अनुसन्धान भइरहेको प्रहरीले जनाएको छ ।