संविधान संशोधनको बहानामा संघीयतामाथि हस्तक्षेप नगर्न राईको चेतावनी

काठमाडौं । श्रम संस्कृति पार्टीका प्रमुख सचेतक आरेन राईले संघीय शासन व्यवस्थालाई कमजोर बनाउने कुनै पनि प्रयास स्वीकार्य नहुने बताएका छन् । उनले संघीयतामाथि अनावश्यक भ्रम फैलाएर संविधान संशोधनका नाममा हस्तक्षेप गर्न खोजिएको आरोप लगाएका छन् ।

बुधबार प्रतिनिधिसभाको बैठकमा बोल्दै राईले विगतमा एकतन्त्रीय शासन सञ्चालन गर्ने शक्तिहरूले नै संघीयता खर्चिलो र असफल भएको भन्दै जनतामा भ्रम फैलाउने काम गरेको दाबी गरे । उनका अनुसार संघीय व्यवस्थामा सुधार आवश्यक भए सुधार गर्न सकिने भए पनि यसको मूल मर्म र संरचनामाथि प्रहार गर्न नहुने स्पष्ट पारे ।

राईले सरकारले संविधान संशोधनलाई बहाना बनाएर संघीयताको अधिकार र संरचनामा छेडखानी गर्न खोजेको आरोप लगाउँदै त्यसप्रति सचेत रहन आग्रह गरे । उनले लोकतान्त्रिक व्यवस्थामा सरकार कानुन, प्रक्रिया र संवैधानिक मूल्यअनुसार अघि बढ्नुपर्ने बताए ।

उनले सरकारलाई शक्ति प्रदर्शनभन्दा लोकतान्त्रिक अभ्यासलाई प्राथमिकता दिन सुझाव दिँदै लोकतन्त्रमा मनपरी ढंगले शासन चलाउन खोज्नु उचित नहुने धारणा व्यक्त गरे । ‘सरकार सुपर वेमा होइन, लोकतान्त्रिक विधि र प्रक्रियाको बाटोमा हिँड्नुपर्छ’ भन्दै उनले राज्य सञ्चालनमा संयम र उत्तरदायित्व आवश्यक रहेको उल्लेख गरे ।

राईले जनताका अधिकार संकुचित गर्ने कुनै पनि प्रयास अन्ततः लोकतन्त्रकै लागि घातक हुने चेतावनी दिँदै सरकारलाई अहंकार र तानाशाही प्रवृत्तिबाट टाढा रहन आग्रह गरे । ‘सरकार हौसिनु हुँदैन, उम्लिनु हुँदैन, उम्लिएपछि पोखिन्छ’ भन्दै उनले लोकतान्त्रिक मूल्य र संविधानको सम्मान गर्दै अघि बढ्न सरकारलाई आग्रह गरे ।