केप भर्डेको अर्को सनसनीपूर्ण नतिजा, उरुग्वेसँग पनि बराबरी

काठमाडौं । फिफा विश्वकप–२०२६ अन्तर्गत समूह ‘एच’ को खेलमा दुई पटकको विश्वविजेता उरुग्वे नवप्रवेशी केप भर्डेसँग २–२ गोलको बराबरीमा रोकिएको छ । अमेरिकाको मियामीमा सम्पन्न खेलमा दुवै टोलीले अग्रता लिए पनि त्यसलाई जोगाउन नसक्दा अंक बाँड्न बाध्य भए।

खेलको २१औँ मिनेटमा केभिन पिनाले आकर्षक फ्रिकिक गोल गर्दै केप भर्डेलाई सुरुआती अग्रता दिलाए । पहिलो हाफको अन्त्यतिर उरुग्वे खेलमा फर्कियो । ४४औँ मिनेटमा म्याक्सी अराजोले बराबरी गोल गरे भने इन्जुरी समयमा अगस्टिनले गोल थप्दै उरुग्वेलाई २–१ को अग्रता दिलाए ।

तर दोस्रो हाफमा केप भर्डेले उत्कृष्ट पुनरागमन गर्‍यो । ६१औँ मिनेटमा उरुग्वेका रक्षक र गोलकिपरबीचको समन्वय अभावको फाइदा उठाउँदै हेलियो भारेलाले गोल गरेपछि खेल २–२ को बराबरीमा पुग्यो । त्यसपछि दुवै टोलीले केही अवसर सिर्जना गरे पनि थप गोल हुन सकेन ।

उरुग्वेले बल नियन्त्रण र प्रहारको संख्यामा स्पष्ट रूपमा दबाब बनाए पनि जित निकाल्न असफल रह्यो । यस नतिजापछि उरुग्वे र केप भर्डेको समान २ खेलबाट २–२ अंक भएको छ । समूहको शीर्ष स्थानमा ४ अंकसहित स्पेन रहेको छ भने साउदी अरेबियाको खातामा १ अंक छ ।

बेल्जियम र इरानबीच गोलरहित प्रतिस्पर्धा
समूह ‘जी’ अन्तर्गत बेल्जियम र इरानबीचको खेल ०–० को बराबरीमा सकिएको छ । लगातार दोस्रो खेलमा पनि दुवै टोलीले बराबरी खेलेपछि जितको खाता खोल्न सकेनन् ।

खेलको २७औँ मिनेटमा इरानले गोल गरे पनि भिडियो समीक्षा पछि अफसाइड ठहर गर्दै त्यसलाई मान्यता दिइएन । त्यसपछि दुवै टोलीले गोलका अवसर सिर्जना गरे पनि सफल हुन सकेनन् ।

बेल्जियमले ६७औँ मिनेटमा ठूलो झट्का बेहोर्नुपर्‍यो । डिफेन्डर नाथन एनगोयले रातो कार्ड पाएपछि टोली १० खेलाडीमा सीमित भयो । संख्यात्मक रूपमा कमजोर बनेपछि बेल्जियम रक्षात्मक रणनीतिमा केन्द्रित रह्यो र इरानलाई गोल गर्नबाट रोक्न सफल भयो ।

यस बराबरीसँगै दुवै टोलीले दोस्रो खेलबाट पनि एक–एक अंक थपेका छन् । बेल्जियमले पहिलो खेलमा इजिप्टसँग १–१ को बराबरी खेलेको थियो भने इरानले न्युजिल्यान्डसँग २–२ को नतिजा निकालेको थियो ।

विश्व वरीयतामा बेल्जियम नवौँ र इरान २१औँ स्थानमा रहे पनि मैदानमा भने दुवै टोलीबीच कडा प्रतिस्पर्धा देखिएको थियो ।