जापानको शानदार प्रदर्शन, ट्युनिसियालाई ४–० ले हराउँदै नकआउट नजिक

काठमाडौं । फिफा विश्वकप–२०२६ अन्तर्गत समूह ‘एफ’ को खेलमा जापानले ट्युनिसियामाथि ४–० को प्रभावशाली जित दर्ता गर्दै नकआउट चरण पुग्ने सम्भावना बलियो बनाएको छ ।

मेक्सिकोको मोन्टेरेस्थित स्टाडियो मोन्टेरीमा सम्पन्न खेलमा जापानले सुरुदेखि नै उत्कृष्ट प्रदर्शन गरेको थियो । खेलको चौथो मिनेटमै दाइची कामाडाले गोल गर्दै टोलीलाई अग्रता दिलाएका थिए ।

जापानका लागि असाय उएदाले दुई गोल गरे भने दाइची कामाडा र जुन्या इटोले समान एक–एक गोल थपे । जापानी टोलीले खेलभरि ट्युनिसियामाथि दबाब कायम राख्दै सहज जित निकालेको हो ।

यस जितसँगै जापानले दुई खेलबाट चार अंक जोडेको छ । समान चार अंक रहेको नेदरल्यान्ड्ससँग जापान समूहको शीर्ष स्थानका लागि प्रतिस्पर्धामा रहेको छ । जापानले आफ्नो पहिलो खेलमा नेदरल्यान्ड्ससँग २–२ को बराबरी खेलेको थियो ।

लगातार दोस्रो हार व्यहोरेको ट्युनिसिया भने समूह चरणबाटै बाहिरिएको छ । यसअघि ट्युनिसिया स्वीडेनसँग ५–१ गोलअन्तरले पराजित भएको थियो ।

विश्वकपमा जापान र ट्युनिसिया २००२ पछि पहिलोपटक आमनेसामने भएका हुन् । त्यतिबेला पनि जापानले ट्युनिसियालाई २–० ले पराजित गरेको थियो ।