देशका विभिन्न स्थानबाट लागूऔषधसहित १४ जना पक्राउ

काठमाडौं । प्रहरीले नियमित गस्तीका क्रममा देशका विभिन्न जिल्लाबाट लागूऔषधसहित १४ जनालाई पक्राउ गरेको छ । केन्द्रीय प्रहरी समाचारकक्षका अनुसार छुट्टाछुट्टै स्थानमा सञ्चालन गरिएको कारबाहीमा उनीहरूलाई नियन्त्रणमा लिइएको हो ।

बझाङको जयपृथ्वी नगरपालिका–९ चिउरीखानबाट खैरो हेरोइनसहित दुई जना पक्राउ परेका छन् भने रूपन्देहीको कञ्चन गाउँपालिका–५ गरगरेस्थित देउराली टोलबाट दुई जना र कैलालीको धनगढी उपमहानगरपालिका–९ ब्राङ्ग्रा कटानबाट एक जनालाई नियन्त्रणमा लिइएको प्रहरीले जनाएको छ ।

यस्तै, मोरङको कानेपोखरी गाउँपालिका–६ बाट तीन जना, कञ्चनपुरको बेलौरी नगरपालिका–६ बाट दुई जना र झापाको भद्रपुर नगरपालिका–४ डाँगीबारीबाट दुई जनालाई पक्राउ गरिएको छ ।

नवलपरासी पूर्वको विनयी त्रिवेणी गाउँपालिका–२ दुम्कीबास बजारबाट चिकित्सकको सिफारिसमा मात्र पाइने स्पास्मो ८८ ट्याब्लेट तथा नगद ८ हजार ५०० रुपैयाँसहित दुई जनालाई नियन्त्रणमा लिइएको छ ।

यसैबीच, बाँकेको कोहलपुर नगरपालिका–१५ चौधरिया गाउँबाट एक जनालाई डिजिटल तराजुसहित गए राति पक्राउ गरिएको प्रहरीले जनाएको छ । प्रहरीले घटनाबारे थप अनुसन्धान जारी राखेको छ ।