कांग्रेसले समानुपातिकतर्फ चयन हुने सांसदहरूको नाम टुंग्यायो

काठमाडौं । नेपाली कांग्रेसले प्रतिनिधिसभा निर्वाचनअन्तर्गत समानुपातिकतर्फबाट चयन हुने सांसदहरूको नाम टुंग्याएको छ । आइतबार सानेपास्थित पार्टी केन्द्रीय कार्यालयमा बसेको कार्यसम्पादन समितिको बैठकले २० जनाको नाम निर्वाचन आयोगमा पठाउने निर्णय गरेको हो ।

बैठकले १५ महिला र ५ पुरुष गरी २० जनाको नाम आयोगमा बुझाउने निर्णय गरेको कांग्रेसले जनाएको छ । पुरुषतर्फ भने विभिन्न क्लस्टरमा बन्दसूचीको पहिलो नम्बरमा रहेका व्यक्तिहरूलाई प्राथमिकतामा राखिएको बताइएको छ ।

पार्टी प्रवक्ता देवराज चालिसेका अनुसार आदिवासी जनजाति र खसआर्य क्लस्टरबाट ६–६ जना समावेश गरिनेछ । त्यस्तै दलित र मधेसी समूहबाट ३–३ जनाको नाम पठाउने निर्णय गरिएको उनले जानकारी दिए ।

यसैगरी मुस्लिम र थारु समुदायबाट १–१ जनाको प्रतिनिधित्व रहनेछ । खसआर्य क्लस्टरअन्तर्गत पिछडिएको क्षेत्रबाट पनि एक जनाको नाम पठाइने चालिसेले बताए ।

कांग्रेसले निर्णय गरेर पठाएको नामावली निर्वाचन आयोगले नै औपचारिक रूपमा सार्वजनिक गर्ने प्रवक्ता चालिसेले जानकारी दिए ।