फागुन २१ मा हुने निर्वाचनमा भाग लिन दल दर्ताको समयसीमा सार्वजनिक

काठमाडौं । आउँदो फागुन २१ गते हुने प्रतिनिधिसभा निर्वाचनका लागि निर्वाचन आयोगले कार्यतालिका स्वीकृत गर्दै महत्वपूर्ण मितिहरू तय गरेको छ ।

निर्वाचन आयोगका अनुसार मंसिर १ देखि १० गतेसम्म राजनीतिक दलहरूले निर्वाचनका लागि आफ्नो दर्ता प्रक्रिया पूरा गर्नुपर्नेछ । यो अवधिमा नयाँ र पुराना दलहरू सबैले आयोगमा आफ्नो उपस्थिति जनाउनु पर्नेछ ।

जेन–जी आन्दोलनको बलमा प्रधानमन्त्री नियुक्त भएकी सुशीला कार्कीले प्रतिनिधिसभा विघटन गर्दै नयाँ निर्वाचनको घोषणा गरेकी थिइन् । यस घोषणापछि, नयाँ राजनीतिक शक्तिका रूपमा उदाएका युवाहरू सक्रिय भएका छन् । उनीहरूले नयाँ दल गठन गरी निर्वाचनमा प्रतिस्पर्धा गर्ने तयारी गरेका छन् ।

निर्वाचन आयोगका प्रवक्ता नारायणप्रसाद भट्टराईका अनुसार माघ २ मा पहिलो हुने प्रणाली अन्तर्गत निर्वाचन अधिकृतको कार्यालय स्थापना गरिने छ । त्यस्तै फागुन ३ देखि १८ सम्म निर्वाचन प्रचारप्रसारको अवधि तोकिएको छ ।

कार्यतालिका अनुसार फागुन १८ पछि प्रचारप्रसार निषेध अवधि लागू हुनेछ भने फागुन २१ को बिहान ७ बजेबाट बेलुका ५ बजेसम्म मतदान, तत्पश्चात मतगणना सुरू हुनेछ ।

समानुपातिक निर्वाचन प्रणालीका लागि छुट्टै कार्यक्रम तय गरिएको छ । कार्यक्रम अनुसार मंसिर १५ गत निर्वाचन अधिकृतको कार्यालय स्थापना हुनेछ । पुस १८ र १९ गते बन्दसूची पेस गर्ने मिति तोकिएको छ ।