‘जनतामा निराशा बढ्दो छ, सबै दल राष्ट्रिय मुद्दामा एक हुनुपर्छ’

काठमाडौं । सत्तारुढ राष्ट्रिय स्वतन्त्र पार्टी (रास्वपा) का सांसद अमरेश सिंहले मुलुकमा बढ्दो निराशाजनक अवस्थाप्रति संसद्को ध्यानाकर्षण गराउँदै सरकार जनताको अपेक्षा पूरा गर्न असफल भएको बताएका छन् ।

मंगलबार प्रतिनिधिसभा बैठकमा बोल्दै उनले अहिले व्यवसायी, विद्यार्थी, युवा तथा आम नागरिकमा भविष्यप्रतिको विश्वास कमजोर बन्दै गएको टिप्पणी गरे । उनले देशमा आशाको वातावरण सिर्जना गर्न सरकार सफल हुन नसकेको दाबी गरे ।

आफ्नो निर्वाचन क्षेत्र सर्लाहीका युवा विवेक मण्डलको आत्मदाहपछि भएको निधनप्रति श्रद्धाञ्जली अर्पण गर्दै सिंहले उक्त घटनाले आफू अत्यन्त मर्माहत भएको बताए । उनले यही साताभित्र तीन जना युवाले आत्मदाह गरेको उल्लेख गर्दै यसलाई समाजमा गहिरिँदै गएको निराशाको संकेतका रूपमा लिनुपर्ने धारणा राखे ।

सांसद सिंहले राज्य सञ्चालन गर्ने जिम्मेवारीमा रहेका सबै पक्षले जनताको पीडा बुझ्नुपर्ने आवश्यकता औँल्याए । ‘देशमा बाँच्न र केही गर्न सकिँदैन भन्ने सोच फैलिन थालेको छ । संसद्ले यस्तो निराशाजनक भाष्यलाई थप बल पुग्ने काम गर्नु हुँदैन,’ उनले भने ।

उनले सत्ता अस्थायी भए पनि जनता र लोकतन्त्र स्थायी हुने उल्लेख गर्दै राजनीतिक दलहरूबीच प्रतिस्पर्धाभन्दा राष्ट्रिय हितलाई प्राथमिकता दिन आग्रह गरे । ‘आज सत्ता हाम्रो हातमा होला, भोलि नहुन पनि सक्छ । तर जनता र लोकतन्त्र सुरक्षित रहे मात्र राजनीति पनि सुरक्षित रहन्छ,’ उनले बताए ।

सिंहले मुलुक अहिले जटिल अवस्थाबाट गुज्रिरहेको भन्दै साझा राष्ट्रिय एजेन्डामा सबै राजनीतिक दल एकजुट हुनुपर्ने आवश्यकता औँल्याए । सभामुखमार्फत उनले संसद्मा राष्ट्रिय मुद्दामाथि केन्द्रित बहस अघि बढाउन आग्रह गर्दै सबै दलको सहकार्यबाट मात्रै देशलाई वर्तमान संकटबाट बाहिर निकाल्न सकिने विश्वास व्यक्त गरे ।