विरोधबीच वैकल्पिक विकास वित्त परिचालन विधेयक पारित

काठमाडौं । प्रतिनिधिसभाबाट विपक्षी दलहरूको विरोधकैबीच वैकल्पिक विकास वित्त परिचालन विधेयक, २०८२ बहुमतले पारित भएको छ । बिहीबार बसेको प्रतिनिधिसभा बैठकमा अर्थमन्त्री डा. स्वर्णिम वाग्लेले प्रस्तुत गरेको विधेयक बहुमतले स्वीकृत भएको सभामुख डोलप्रसाद अर्यालले घोषणा गरेका हुन् ।

विधेयकमाथि छलफलका क्रममा संशोधन प्रस्ताव दर्ता गरेका रास्वपा सांसद लिमा अधिकारी र गणेश कार्कीले आफ्ना संशोधन प्रस्ताव फिर्ता लिएका थिए । विपक्षी दलका सांसदहरू भने विरोध जारी राख्दै छलफलमा सहभागी भएनन् ।

अर्थमन्त्री वाग्लेले संशोधनकर्ताहरूले उठाएका केही महत्त्वपूर्ण विषय सरकारद्वारा स्वीकार गरिएको जानकारी सदनलाई गराएका थिए ।

उता विपक्षी सांसदहरूले प्रधानमन्त्री वालेन्द्र शाहको राजीनामा माग गर्दै बैठकभर नाराबाजी गरेका थिए । प्रधानमन्त्री संसद्‌मा उपस्थित नभएको विषयलाई लिएर विपक्षीहरूले लगातार विरोध जनाउँदै आएका छन् ।

बैठकपछि सभामुख अर्यालले प्रतिनिधिसभाको अर्को बैठक जेठ १२ गते मंगलबार बिहान ११ः०० बजे बस्ने गरी स्थगित भएको जानकारी दिए ।