कोटेश्वरमा सहायक हवल्दारको हत्याः क्रिकेट सिक्दै गरेका भण्डारी ‘मुख्य अभियुक्त’का रूपमा पक्राउ

काठमाडौं । जेन–जी आन्दोलनको क्रममा प्रहरी प्रभाग कोटेश्वरका सहायक हवल्दार अमृत गुरुङको हत्या क्रिकेट सिक्दै गरेका युवकबाट गरिएको खुलासा भएको छ ।

हत्या आरोपमा पक्राउ परेका १९ वर्षीय अनुपम भण्डारीले भारतको बैंगलोरमा दुई हप्ता क्रिकेट तालिम लिएर फर्किएको र काठमाडौंको शान्तिनगरस्थित ग्रेट हिमालयन क्रिकेट एकेडेमीमा सिकाइ जारी रहेको बताएका छन् । कैलालीको लम्मीचुहा नगरपालिका–४ घर भएका भण्डारीलाई काठमाडौं उपत्यका अपराध अनुसन्धान कार्यालयको टोलीले कैलालीबाट पक्राउ गरी काठमाडौं ल्याएको हो ।

अनुसन्धानका क्रममा भण्डारीले जेन–जी आन्दोलनको अघिल्लो दिन गोली लागेर आफ्ना चिनेका विद्यार्थीको मृत्यु भएपछि आफू अत्यन्त रिसाएको बयान दिएका छन् । त्यसै आक्रोशको कारण २४ भदौको आन्दोलनको क्रममा प्रहरीमाथि चक्कु प्रहार गरेको उनले स्विकारेका छन् ।

भण्डारीका अनुसार प्रहरीमाथि प्रहार गरेपछि केही व्यक्तिहरूले सहायक हवल्दार गुरुङलाई घिसार्दै लगेको र त्यस क्रममा उनी घटनास्थलबाट भागेको थिए । प्रहरीले भिडिओ फुटेजका आधारमा उनको पहिचान गरी पक्राउ गरेको हो । घटनाका बेला लगाएको कपडा समेत उनको घरबाट बरामद गरिएको प्रहरीले जनाएको छ ।

घटनामा एक प्रहरीको मृत्यु र अन्य केही घाइते भएका थिए । यसका लागि काठमाडौं जिल्ला अदालतमा कर्तव्य ज्यान र ज्यान मार्ने उद्योग अन्तर्गत मुद्दा दायर गरिएको छ ।

कास्की घर भएका सहायक हवल्दार अमृत गुरुङ नौ महिनाअघि आमा गुमाएर पुनः परिवारको एकमात्र सहारा बनेका थिए । उनको श्रीमती, ७ महिनाको छोरा र ६० वर्षका बाबु अहिले कास्कीमै बसोबास गर्छन् ।

२४ भदौको आन्दोलनको दिन नयाँ बानेश्वर नजिकैको कोटेश्वर प्रहरी प्रभाग आन्दोलनकारीको निशानामा परेको थियो । आगजनी र तोडफोडबीच भाग्ने क्रममा गुरुङलाई धारिलो हतियारले आक्रमण गरिएको थियो ।

त्यो दिनको घटनामा कोटेश्वर प्रभागका ५९ प्रहरीमध्ये १३ जना घाइते भएका थिए । आन्दोलनकारीले प्रहरी बर्दी जलाएका, हतियार लुटेका र कार्यालयमा आगजनी गरेका थिए ।

जेन–जी आन्दोलनको क्रममा ३ प्रहरीसहित ७६ जनाको ज्यान गएको थियो ।