नख्खु कारागारबाट भागेका सञ्जय टक्ला काभ्रेबाट पक्राउ

काठमाडौं । जेनजी आन्दोलनको सुरक्षात्मक अव्यवस्थाका बीच नख्खु कारागारबाट फरार भएका पूर्वराज्यमन्त्री सञ्जय साह उर्फ टक्ला काभ्रेबाट पक्राउ परेका छन् ।

इलाका प्रहरी कार्यालय मंगलटारको टोलीले विशेष सूचनाका आधारमा टक्लालाई नियन्त्रणमा लिएको प्रहरी स्रोतले जनाएको छ । उनलाई अब पुनः कारागारमा पठाउने तयारी भइरहेको छ ।

टक्ला हाल जन्मकैदको सजाय भोगिरहेका थिए । उनी १२ वर्षदेखि जेलमा थिए । उनी जनकपुरको २०६९ वैशाख १८ गतेको बम विस्फोट घटनामा संलग्न रहेको अभियोगमा अदालतबाट दोषी ठहर भएका थिए । उक्त विस्फोटमा ५ जनाको ज्यान गएको थियो ।

टक्लालाई जनकपुरको रेडियो टुडेका सञ्चारकर्मी अरुण सिंहानिया हत्याकाण्डको योजनाकारका रूपमा समेत अदालतले दोषी ठहर गरिसकेको छ ।

जेनजी समूहको प्रदर्शनका क्रममा नख्खु कारागारमा भएको तनावपछि कैदीहरूले विद्रोह गरेका थिए । सुरुमा सहकारी ठगी अभियोगमा रहेका रवि लामिछानेलाई कारागारबाट निकालिएको थियो । त्यसपछि टक्लालगायत अन्य थुप्रै कैदी भाग्न सफल भएका थिए । उनीहरूले कारागारमा आगजनी समेत गरेका थिए ।

टक्लाको पक्राउसँगै प्रहरीले अन्य फरार कैदीहरूको खोजी कार्यलाई तीव्र बनाएको जनाएको छ ।