संघीय संदका बैठक सिंहदरबारकै नयाँ भवनबाट बैठक सञ्चालन हुने

काठमाडौं । संघीय संसदका दुवै सदनको बैठक अब नयाँ बानेश्वरस्थित संसद भवनमा नबस्ने भएको छ । जेनजी आन्दोलनका क्रममा आगजनीबाट ध्वस्त भएको संसद भवनको निरीक्षणपछि अन्तरिम सरकारका मन्त्रीहरूले बैठक अब सिंहदरबारमा निर्माणाधीन नयाँ भवनमा सञ्चालन गरिने बताएका छन् ।

ऊर्जा, भौतिक तथा शहरी विकासमन्त्री कुलमान घिसिङका अनुसार आगामी पुस महिनासम्म सिंहदरबारमा निर्माणाधीन संसद भवनको काम सकिनेछ र त्यही भवनबाट नयाँ निर्वाचित सांसदहरूले कार्य प्रारम्भ गर्नेछन् ।

घिसिङले आन्दोलनकारीको आक्रमण र आगलागीले क्षतिग्रस्त नयाँ बानेश्वरस्थित संसद भवनलाई भने पुरानै स्वरूपमा पुनःनिर्माण गर्ने योजना रहेको जानकारी दिए । उनका अनुसार तत्काल सरसफाइ र डिजाइनको काम अघि बढाइनेछ भने अल्पकालीन र दीर्घकालीन योजनाअनुसार पुनर्निर्माण सुरु गरिनेछ ।

निरीक्षणमा मन्त्री घिसिङसँगै अर्थमन्त्री रामेश्वर खनाल र गृह तथा कानुनमन्त्री ओमप्रकाश अर्याल पनि सहभागी भएका थिए । भदौ २३ र २४ गते चर्किएको जेनजी आन्दोलनका क्रममा प्रदर्शनकारीले संसद भवनलाई मुख्य निशाना बनाएका थिए । आगलागीका कारण भवन पूर्णरूपमा जलेर ध्वस्त भएको छ ।