जेन–जी आन्दोलनमा आक्रमणः देउवाको टाउकोमा १२ वटा टाँका

काठमाडौं । नेपाली कांग्रेसका सभापति शेरबहादुर देउवामाथि जेन–जी आन्दोलनको क्रममा आफ्नै निवास बूढानीलकण्ठमा भएको आक्रमणमा गम्भीर चोट लागेर टाउकोमा १२ वटा टाँका लगाइएको छ ।

कांग्रेस प्रचार विभाग प्रमुख मीनबहादुर विश्वकर्माका अनुसार देउवा दम्पत्ती आक्रमणपछि सुरुमा निकै आत्तिएका थिए तर अहिले स्वास्थ्य अवस्था सामान्यतर्फ फर्कँदै छ । उनले भने, “देउवाको गर्धनभन्दा माथि टाउकोमा धारिलो हतियार प्रहार भएको छ, जसमा १२ वटा टाँका लगाइएको छ । अवस्था सुधार हुँदै गएको छ ।”

चिकित्सकहरूले धारिलो हतियार प्रहारबाट घाउ लागेको पुष्टि गरे पनि कसले, कुन हतियारले आक्रमण गर्‍यो भन्ने विवरण भने अझै स्पष्ट भएको छैन ।

गत भदौ २४ गते भएको जेन–जी आन्दोलन हिंसात्मक रूप लिन पुग्दा आक्रमणकारीहरूले देउवाको बूढानीलकण्ठस्थित निवासमा आगजनी र तोडफोड गरेका थिए । त्यस क्रममा घरमै रहेका देउवा र आरजु राणा देउवामाथि हातपात र कुटपिट भएको थियो । घटनापछि दुबैजनाको शरीर रगताम्ये भएको बताइएको छ ।

नेपाली कांग्रेसले सभापति देउवा र केन्द्रीय सदस्य आरजु देउवामाथिको आक्रमणको कडा शब्दमा निन्दा गरेको छ । प्रचार विभाग प्रमुख विश्वकर्माले भने, “लोकतन्त्रका लागि अविचल योगदान गर्नुभएका सभापति देउवा र आरजु राणा देउवामाथि भएको यो अमानवीय र बर्बर घटनाप्रति पार्टी गहिरो रोष व्यक्त गर्दछ ।”