गोपाल किरातीको देशभक्त समाजवादी मोर्चा माओवादी केन्द्रमा समाहित

काठमाडौं । पूर्वमन्त्री गोपाल किराती नेतृत्वको देशभक्त समाजवादी मोर्चा औपचारिक रूपमा नेकपा (माओवादी केन्द्र) मा समाहित भएको छ ।

माओवादी केन्द्रका अध्यक्ष पुष्पकमल दाहाल ‘प्रचण्ड’ र मोर्चाका अध्यक्ष किरातीले संयुक्त रूपमा सहमति–पत्र सार्वजनिक गर्दै मोर्चाको माओवादी केन्द्रमा विलयको घोषणा गरेका हुन् ।

कात्तिक १५ गते नै दुई पक्षबीच सहमति भइसकेको भए पनि उक्त पत्र आज मात्र सार्वजनिक गरिएको हो । सहमति–पत्रमा हालको राजनीतिक परिस्थितिलाई ‘अभूतपूर्व जोखिमपूर्ण’ बताउँदै त्यसलाई सही दिशातर्फ डोर्याउन एकताले महत्वपूर्ण भूमिका खेल्ने उल्लेख गरिएको छ ।

सहमति–पत्रमा भनिएको छ, “जनयुद्धका बेला अपनाइएको प्रतिकूलतालाई अनुकूलतामा रूपान्तरण गर्ने नीति अनुसार देशका कान्तिकारीबीच एकता र ध्रुवीकरण आजको प्राथमिक कार्य हो । यही एकताबाट संघीय लोकतान्त्रिक गणतन्त्रको रक्षा र नेपाली समाजको प्रकृति अनुसारको विकास सम्भव छ ।”

सहमतिको तीन प्रमुख बुँदा

१. विगतमा भए गरेका वैचारिक-राजनीतिक एवं सांगठनिक गल्ती कमजोरीहरुका सम्बन्धमा कार्यटोली बनाई वस्तुनिष्ठ समिक्षाको दस्तावेजीकरण गर्ने  । जसको मार्गदर्शनमा जनवर्गको तहबाटै एकता-संघर्ष-रुपान्तरण, मुख्यतः रुपान्तरण र नयाँ आधारमा नयाँ एकता सृष्टि गर्दै नेपाली क्रान्तिको समाजवादी कार्यभार उठान गर्न सामर्थ्य आर्जन गर्ने ।

२. कमरेड गोपाल किराँतीद्धारा विकसित देशभक्तिपूर्ण पहिचानसहितको समाजवादी लोकतन्त्रवारे पार्टीमा व्यवस्थित छलफल गर्दै पूर्ण जनवादका आधारमा निर्णय लिने ।

३. उपरोक्त सहमति कार्यान्वयन गर्न देशभक्त समाजवादी मोर्चाका अध्यक्ष गोपाल किराती नेतृत्वमा मार्क्सवादी क्रान्तिकारीहरु नेकपा (माओवादी केन्द्र) मा ध्रुवीकृत हुने ।

सहमति पत्रमा स्वदेश तथा विदेशमा संघर्षरत मजदुर, किसान, सुकुम्बासी, वित्तीय शोषणपीडित, विस्थापित वर्ग, महिला, दलित, जनजाति र पहिचानका पक्षधर सबैलाई राष्ट्रिय स्वाधीनता, अखण्डता र सार्वभौमसत्ताको रक्षा अभियानमा सहभागी हुन आह्वान गरिएको छ ।

मोर्चा–माओवादी एकतालाई दलाल र नोकरशाही पूँजीवादी शासन अन्त्य गर्दै समाजवाद उन्मुख राज्यव्यवस्थाको कार्यान्वयनतर्फको ‘रणनीतिक कदम’ का रूपमा प्रस्तुत गरिएको छ ।