खुरकोट–मन्थली सडकखण्डमा सुरक्षा जोखिमपछि अरनिको यातायातका बस सेवा स्थगित

काठमाडौं । नेपाल अरनिको यातायात सेवा प्रा.लि. ले काठमाडौँ–खुरकोट हुँदै मन्थलीसम्म सञ्चालन हुँदै आएका आफ्ना सम्पूर्ण व्यावसायिक बस सेवा अस्थायी रूपमा स्थगित गरेको जनाएको छ । कम्पनीले जारी गरेको सूचनाअनुसार हालै भएको दुर्घटनापछि देखिएको सुरक्षा जोखिमका कारण अर्को सूचना जारी नभएसम्मका लागि सेवा रोकिएको हो ।

कम्पनीका अनुसार काठमाडौँबाट खुरकोट हुँदै मन्थलीसम्म सञ्चालन हुँदै आएका सबै बसहरू हाललाई स्थगित गरिएको हो । रामेछाप जिल्लाको मन्थली नगरपालिका–६ मसानेटार क्षेत्रमा भएको दुर्घटनालाई ध्यानमा राख्दै यात्रु तथा कर्मचारीको सुरक्षालाई प्राथमिकता दिँदै यस्तो निर्णय गरिएको कम्पनीले जनाएको छ ।

कम्पनीले यस निर्णयबारे सम्बन्धित व्यवसायी, मजदुर तथा कर्मचारीलाई जानकारी गराइसकेको र अवस्थाको मूल्याङ्कनपछि सेवा पुनः सञ्चालनबारे अर्को सूचना जारी गरिने जनाएको छ ।