सुनुवार सेवा समाजले गर्यो उधौली पर्वको अवसरमा शुभकामना व्यक्त

काठमान्डु । सुनुवार सेवा समाज (सुसेस), संघीय समितिले किरात चाड उधौली पर्व २०८५ (वि.स. २०८२) को उपलक्ष्यमा देश–विदेशमा रहेका सम्पूर्ण सुनुवार समुदाय तथा नेपाली जनसाधारणप्रति सुख, शान्ति, समृद्धि र उत्तरोत्तर प्रगतिका लागि हार्दिक शुभकामना व्यक्त गरेको छ ।

समाजद्वारा जारी शुभकामना सन्देशमा उधौली पर्वले मानव समुदायको कल्याणको प्रतीक एवं पितृपूजासँग जोडिएको सांस्कृतिक पहिचानलाई संरक्षण गर्ने महत्वपूर्ण अवसर प्रदान गरेको उल्लेख छ । पर्वसँग सम्बन्धित परम्परा, चालचलन र सामूहिक पूजा संस्कृतिले समुदायलाई एउटै भावना र पहिचानमा बाँध्ने बताइएको छ ।

शुभकामना सन्देशमा केही दशकयता राज्यको नीति तथा परिस्थिति र लोभलालचका कारण सुनुवार समुदायको भाषा, संस्कृति र परम्परागत ज्ञान संकटमा परेको भन्दै यसलाई संरक्षण र प्रवर्द्धन गर्न सबैलाई आह्वान गरिएको छ । विदेश तथा देशका विभिन्न शाखा, प्रदेश, जिल्ला र स्थानीय तहमा रहेका समितिहरूले यस पर्वलाई भव्यताका साथ मनाइरहेको समाजले जनाएको छ ।

समाजका अध्यक्ष अमृतबहादुर सुनुवारद्वारा हस्ताक्षरित सन्देशमा किरातहरूको ऐतिहासिक, सांस्कृतिक र धार्मिक पर्व उधौलीमार्फत समुदायबीच एकता, पहिचान र परम्परागत ज्ञानको प्रसार हुने विश्वास व्यक्त गरिएको छ ।