भनिमण्डलबाट ९१ लाख नगदसहित एक जना पक्राउ

काठमाडौं । ललितपुरको भनिमण्डल क्षेत्रबाट स्रोत नखुलेको ९१ लाख ५० हजार रुपैयाँसहित एक जना युवकलाई प्रहरीले पक्राउ गरेको छ ।

उपत्यका प्रहरी कार्यालय, रानीपोखरीबाट खटिएको विशेष प्रहरी टोलीले सिन्धुली स्थायी घर भएका गौरव स्याङ्तानलाई नियन्त्रणमा लिएको हो ।

प्रहरीका अनुसार स्याङ्तानको साथबाट ठूलो मात्रामा नगदसहित पैसा गन्ने मेसिन र करिब १ किलो ४ सय ग्राम गाँजा समेत बरामद गरिएको छ ।

उक्त कार्यवाहीबारे जानकारी दिँदै उपत्यका प्रहरी कार्यालयका प्रमुख तथा एआईजी टेकबहादुर तामाङले स्रोत नखुलेको रकम र लागूपदार्थ फेला परेको पुष्टि गरेका छन् ।

सूचना प्राप्त भएपछि प्रहरी टोली परिचालित गरिएको र हाल स्याङ्तानविरुद्ध थप अनुसन्धान भइरहेको प्रहरीले जनाएको छ।

प्रहरीले उक्त रकमको स्रोत र उद्देश्यबारे अझै केही खुल्न नसकेको बताएको छ ।