६१ किलो सुन तस्करी प्रकरणमा फरार अमला रोका काठमाडौंबाट पक्राउ

काठमाडौं । ६१ किलो सुन तस्करी प्रकरणमा संलग्न रहँदै फरार रहेकी अमला रोका काठमाडौंको टोखा क्षेत्रबाट पक्राउ परेकी छन् । केन्द्रीय अनुसन्धान ब्यूरो (सीआईबी) को टोलीले उनलाई विशेष सूचनाको आधारमा नियन्त्रणमा लिएको हो ।

प्रहरीका अनुसार रोका लामो समयदेखि फरार सूचीमा थिइन् । उनको खोजीका लागि अन्तर्राष्ट्रिय प्रहरी संगठन इन्टरपोलमार्फत ‘डिफ्यूजन नोटिस’ समेत जारी गरिएको थियो । नेपाल बाहिर लुकेर बसेको आशंकामा इन्टरपोल समन्वयबाट खोजी भइरहेको बेला उनी राजधानीमै लुकेर बसेको पत्ता लागेको हो ।

रोका २०८० साल साउन २ गते त्रिभुवन अन्तर्राष्ट्रिय विमानस्थल हुँदै भन्सार छलेर भित्रिएको ६१ किलो सुन तस्करी प्रकरणमा अभियुक्त रहेका बेल्जियम नागरिक दाबा छिरिङकी पत्नी हुन् । यो घटनामा संलग्न समूहले सुनलाई भन्सारको आँखा छल्दै मोटर पार्ट्सका नाममा विमानस्थलबाट बाहिर निकालेको थियो ।

राजस्व अनुसन्धान विभागले उक्त सुन बरामद गरेपछि अनुसन्धान अघि बढाइएको थियो । प्रारम्भिक अनुसन्धानबाट यो तस्करी प्रकरण एक अन्तर्राष्ट्रिय नेटवर्कसँग जोडिएको पुष्टि भइसकेको छ । विभिन्न चरणमा अनुसन्धान हुँदै जाँदा यसअघि नै केही प्रमुख योजनाकारहरू पक्राउ परिसकेका छन्, भने केही अझै फरार छन् ।

प्रहरीले रोका पक्राउपछि यो प्रकरणको थप कडी उजागर हुने विश्वास लिएको छ । उनकाे साथबाट अन्य व्यक्ति वा संस्थासँगको संलग्नता, सम्पत्ति स्रोत तथा तस्करीमार्फत संचित आर्थिक कारोबारसमेत छानबिन गरिने बताइएको छ ।