राईको नेतृत्वमा नेपाल बुद्धिचाल महासङ्घको नयाँ कार्यसमिति गठन

काठमाडौं । नेपाल बुद्धिचाल महासङ्घको विशेष साधारणसभाले पुरानो कार्यसमिति विघटन गर्दै दिपेन राईको अध्यक्षतामा नयाँ तदर्थ कार्यसमिति सर्वसम्मत रूपमा चयन गरेको छ । तत्कालीन अध्यक्ष हेराकाजी महर्जन र महासचिव धरमबहादुर लामाविरुद्ध दर्ता भएको अविश्वास प्रस्ताव पारित भएपछि नयाँ नेतृत्व चयन गरिएको हो ।

यसअघि कार्यसमितिले हेटौँडामा साधारणसभा गर्ने निर्णय गरे पनि बहुमत प्रतिनिधिहरूले काठमाडौंमै सभा आयोजना गर्न माग गरेका थिए । सोहीअनुसार काठमाडौंमा सम्पन्न विशेष साधारणसभाले पुरानो कार्यसमिति भंग गर्दै नयाँ समिति गठन गरेको जनाएको छ ।

नवनिर्वाचित समितिको वरिष्ठ उपाध्यक्षमा ज्ञानेन्द्र पराजुली चयन भएका छन् भने उपाध्यक्षमा विश्व विजय घिमिरे र तारा बहादुर रानाभाट रहेका छन् । त्यसैगरी महासचिवमा धनबहादुर बोगटी, उपमहासचिवमा विजयवोध लावती तथा कोषाध्यक्षमा वीरबहादुर रावत चयन भएका छन् ।

सदस्यहरूमा कुस्माकर काफ्ले, उमेश शाह साना, भगवती अधिकारी, दिनेश थापा, दीर्घराज अधिकारी, धर्मी खड्का, सबिना लामगाडे, टिकादेवी भण्डारी, लक्ष्मी कन्दङ्वा र अञ्जु शाह रहेका छन् ।

विशेष साधारणसभामा पूर्व उपाध्यक्षहरू राजेन्द्र श्रेष्ठ, ज्ञानेन्द्र खाइजु तथा अरुणशंकर वैद्यको उपस्थिति रहेको थियो । कार्यक्रममा राष्ट्रिय स्वतन्त्र पार्टीको खेलकुद विभागका सदस्य शिव सिलवाल प्रमुख अतिथिका रूपमा सहभागी थिए ।

महासंघका नवनिर्वाचित महासचिव धनबहादुर बोगटीका अनुसार बहुमत सदस्यहरूको मागअनुसार पुरानो कार्यसमिति विघटन गरिएको हो । साथै आगामी ९० दिनभित्र महासंघको नियमित १०औँ साधारणसभा सम्पन्न गर्ने निर्णय पनि गरिएको छ ।

नयाँ कार्यसमितिले संस्थागत सुधार, आर्थिक पारदर्शिता, खेलाडीमैत्री वातावरण निर्माण तथा अन्तर्राष्ट्रियस्तरका प्रतियोगिता सञ्चालनलाई प्राथमिकतामा राख्दै महासंघका गतिविधिलाई थप प्रभावकारी बनाउने प्रतिबद्धता जनाएको छ ।