मनसुन सक्रिय, आज पनि देशका अधिकांश क्षेत्रमा वर्षाको सम्भावना

काठमाडौं । देशभर मनसुनी प्रणाली सक्रिय रहेकाले आज (आइतबार) पनि विभिन्न स्थानमा वर्षा हुने सम्भावना रहेको जल तथा मौसम विज्ञान विभागले जनाएको छ । मौसम पूर्वानुमान महाशाखाका अनुसार हाल मनसुनको न्यूनचापीय रेखा आफ्नो औसत अवस्थाकै आसपास रहेकाले मौसममा बदली र वर्षाको क्रम जारी रहने देखिएको हो ।

महाशाखाले हिमाली तथा पहाडी भू–भागमा सामान्यदेखि पूर्ण बदली रहने तथा तराईका अधिकांश क्षेत्रमा आंशिक बदली रहने जनाएको छ । पहाडी र हिमाली क्षेत्रका केही स्थानमा मेघगर्जन र चट्याङसहित मध्यम वर्षा हुने सम्भावना छ ।

यस्तै, बागमती र गण्डकी प्रदेशका तराईका केही स्थान तथा कोशी, मधेश, लुम्बिनी र सुदूरपश्चिम प्रदेशका तराईका एक–दुई स्थानमा पनि मेघगर्जनसहित वर्षा हुन सक्ने पूर्वानुमान गरिएको छ ।

विभागले विशेषगरी बागमती, गण्डकी र कर्णाली प्रदेशका पहाडी तथा हिमाली क्षेत्रका केही स्थानमा भारी वर्षा हुन सक्ने जनाएको छ । सम्भावित जोखिमलाई ध्यानमा राख्दै ती क्षेत्रका बासिन्दालाई आवश्यक सतर्कता अपनाउन आग्रह गरिएको छ ।

रातिको समयमा पनि देशभर सामान्यदेखि पूर्ण बदली रहने अनुमान गरिएको छ । विभागका अनुसार कोशी, बागमती र गण्डकी प्रदेशका पहाडी तथा हिमाली क्षेत्रका केही स्थान तथा लुम्बिनी, कर्णाली र सुदूरपश्चिमका थोरै स्थानमा मेघगर्जन, चट्याङसहित वर्षा हुने र उच्च हिमाली क्षेत्रमा हल्का हिमपातसमेत हुन सक्नेछ।

साथै, तराईका केही स्थानमा पनि राति मेघगर्जनसहित मध्यम वर्षाको सम्भावना रहेको छ । विशेषगरी कोशी, बागमती र गण्डकी प्रदेशका पहाडी तथा हिमाली भू–भागमा रातिको समयमा पनि भारी वर्षा हुन सक्ने भएकाले बाढी, पहिरो र आकस्मिक जोखिमबाट बच्न आवश्यक सावधानी अपनाउन विभागले आग्रह गरेको छ ।