खिजीदेम्बा गल्फ प्रतियोगिता २०८३ सुरु, देम्बाडाँडामा पर्यटन प्रवर्द्धनको नयाँ पहल

खिजीदेम्बा (ओखलढुंगा) । ओखलढुंगाको थोलेदेम्बा डाँडामा खिजीदेम्बा गल्फ प्रतियोगिता २०८३ औपचारिक रूपमा सुरु भएको छ । समुद्री सतहबाट करिब तीन हजार ३५० मिटर उचाइमा अवस्थित देम्बाडाँडा जिल्लाकै अग्लो स्थानमध्ये एक हो, जहाँ पर्यटन प्रवर्द्धन गर्ने उद्देश्यले राष्ट्रिय तथा अन्तर्राष्ट्रिय खेलाडीहरूको सहभागितामा प्रतियोगिता आयोजना गरिएको हो । शनिबार आयोजित उद्घाटन समारोहमा खिजीदेम्बा गाउँपालिकाका अध्यक्ष गम्बु शेर्पाले कार्यक्रमको शुभारम्भ गरेका थिए ।

नयाँ वर्ष २०८३ को अवसर पारेर वैशाख १ र २ गतेसम्म सञ्चालन हुने यस प्रतियोगिताले स्थानीय पर्यटनलाई थप गति दिने अपेक्षा गरिएको छ । नेपाल सरकारले सूचीकृत गरेको महत्वपूर्ण गन्तव्य देम्बाडाँडालाई केन्द्रमा राख्दै गाउँपालिकाले दीर्घकालीन पर्यटन विकासको लक्ष्यसहित यो महोत्सव आयोजना गरेको अध्यक्ष शेर्पाले जानकारी दिए ।

गाउँपालिकाले हरेक वर्ष नयाँ वर्षको अवसरमा देम्बाडाँडामा गल्फ प्रतियोगिता सञ्चालन गर्ने नीतिगत निर्णयसमेत यसअघि नै गरिसकेको छ ।

कार्यक्रममा विभिन्न जातीय समुदायले आ–आफ्ना सांस्कृतिक झाँकी प्रस्तुत गरेका थिए, जसले महोत्सवलाई अझ रंगीन बनाएको थियो । साथै, चैत २८ देखि ३० गतेसम्म जातीय झाँकी प्रतियोगिता समेत सञ्चालन गरिएको गाउँपालिकाले जनाएको छ ।

एकै स्थानबाट दर्जनौँ हिमशृंखलाको दृश्यावलोकन गर्न सकिने, साथै विभिन्न प्रजातिका गुराँस र फूलहरूको सुगन्धमा रमाउन पाइने भएकाले यो क्षेत्र पर्यटकको रोजाइमा पर्दै आएको छ ।

खिजीदेम्बा गल्फ प्रतियोगिताको मुख्य उद्देश्य खेलमार्फत गाउँपालिकालाई अन्तर्राष्ट्रिय स्तरमा चिनाउनुका साथै आन्तरिक तथा बाह्य पर्यटन प्रवर्द्धन गर्दै स्थानीय अर्थतन्त्रलाई सुदृढ बनाउनु रहेको आयोजकले जनाएको छ ।