दोस्रो सुपर ओभरमा दक्षिण अफ्रिकाको रोमाञ्चक जित, अफगानिस्तान पराजित

काठमाडौं । आईसीसी पुरुष टी–२० विश्वकप अन्तर्गत दक्षिण अफ्रिकाले अफगानिस्तानलाई दोस्रो सुपर ओभरमा पराजित गर्दै रोमाञ्चक जित हात पारेको छ । निर्धारित २० ओभरको खेल बराबरीमा सकिएपछि खेल सुपर ओभरमा पुगेको थियो भने पहिलो सुपर ओभर पनि बराबरी भएपछि विजेता दोस्रो सुपर ओभरबाट टुंगिएको हो ।

दोस्रो सुपर ओभरमा दक्षिण अफ्रिकाले २३ रन बनाएको थियो । जवाफमा अफगानिस्तानले १९ रन मात्र बनाउन सकेपछि दक्षिण अफ्रिकाले महत्वपूर्ण दुई अंक जोड्यो । यस जितसँगै समूह ‘डी’मा रहेको दक्षिण अफ्रिका ४ अंकसहित तालिकाको दोस्रो स्थानमा पुगेको छ । समान ४ अंक भए पनि उत्कृष्ट नेट रनरेटका आधारमा न्युजिल्यान्ड शीर्ष स्थानमा रहेको छ । अफगानिस्तान भने लगातार दोस्रो हारपछि दबाबमा परेको छ ।

पहिलो सुपर ओभरमा दुवै टोलीले समान १७–१७ रन बनाएपछि खेल अझ रोमाञ्चक बनेको थियो । दक्षिण अफ्रिकाले पहिलो सुपर ओभरमा अन्तिम बलमा छक्का प्रहार गर्दै खेललाई बराबरीमा पुर्‍याएको थियो । जवाफमा अफगानिस्तानका अजमतुल्लाह ओमारजाइले आक्रामक ब्याटिङ गर्दै ५ बलमा १६ रन जोडेका थिए ।

त्यसअघि दक्षिण अफ्रिकाले दिएको १ सय ८८ रनको लक्ष्य पछ्याएको अफगानिस्तान १९.४ ओभरमा १ सय ८७ रनमा अलआउट भएपछि खेल सुपर ओभरमा पुगेको थियो । अफगानिस्तानका लागि ओपनर रहमुल्लाह गुरबाजले ४२ बलमा ८४ रनको उत्कृष्ट इनिङ खेले । उनले ४ चौका र ७ छक्का प्रहार गरेका थिए । अजमतुल्लाह ओमारजाइले २२ रन तथा कप्तान राशिद खानले २० रनको योगदान दिए ।

दक्षिण अफ्रिकाका लागि लुंगी एनगिडीले ३ विकेट लिए भने मार्को जानसेन, कागिसो रबाडा, जर्ज लिन्डे र केशव महाराजले समान एक–एक विकेट लिए ।

यसअघि अहमदाबादस्थित नरेन्द्र मोदी स्टेडियममा टस जितेर फिल्डिङ रोजेको अफगानिस्तानविरुद्ध पहिले ब्याटिङ गरेको दक्षिण अफ्रिकाले २० ओभरमा ६ विकेट गुमाएर १ सय ८७ रन बनाएको थियो । रायन रिकेल्टोनले २८ बलमा ६१ रन बनाउँदा क्विन्टन डि ककले ५९ रनको योगदान दिए । डेवाल्ड ब्रिभिसले २३ र डेभिड मिलरले २० रन जोडे ।

अफगानिस्तानका लागि अजमतुल्लाह ओमारजाइले ३ विकेट लिए भने राशिद खानले २ तथा फजलहक फारुकीले एक विकेट लिए ।