बेल्जियमलाई अन्तिम समयमा हराउँदै स्पेनको १६ वर्षपछि सेमिफाइनल यात्रा

काठमाडौं । स्पेन १६ वर्षपछि फिफा विश्वकपको सेमिफाइनलमा पुगेको छ । फिफा विश्वकप २०२६ अन्तर्गत क्वार्टरफाइनलमा बेल्जियममाथि २–१ को रोमाञ्चक जित निकाल्दै स्पेनले अन्तिम चारमा स्थान सुरक्षित गरेको हो ।

अमेरिकाको लस एन्जलसमा सम्पन्न खेलमा स्पेनका लागि निर्णायक गोल मिकेल मेरिनोले खेलको ८८औँ मिनेटमा गरे । पाउ क्युबार्सीको प्रहार बेल्जियमका गोलरक्षकले पूर्ण रूपमा नियन्त्रणमा लिन नसक्दा आएको रिबाउन्डमा मेरिनोले सहज फिनिस गर्दै टोलीलाई सेमिफाइनल पुर्‍याए ।

स्पेनले पहिलो अग्रता भने ३०औँ मिनेटमा फेबियन रुइजको गोलमार्फत लिएको थियो । तर ४१औँ मिनेटमा चार्ल्स डे केटलेरले हेडमार्फत बराबरी गोल फर्काएपछि पहिलो हाफ १–१ को अवस्थामा सकिएको थियो । खेल बराबरीतर्फ अघि बढिरहेको अवस्थामा मेरिनोको अन्तिम समयको गोलले स्पेनलाई जित दिलायो ।

पूरै खेलमा स्पेनले बलमाथि स्पष्ट नियन्त्रण कायम राख्यो । स्पेनले १६ पटक प्रहार गर्दा बेल्जियमले केवल ५ प्रहार मात्र गर्न सक्यो । आक्रामक खेल प्रस्तुत गरेको स्पेनले अन्ततः त्यसको प्रतिफल जितका रूपमा पायो ।

सन् २०१० मा विश्वकप उपाधि जितेको स्पेन त्यसयता विश्वकपमा अपेक्षाअनुसार प्रदर्शन गर्न सकेको थिएन । २०१४ मा समूह चरणबाट बाहिरिएको स्पेन २०१८ र २०२२ मा भने अन्तिम १६ बाटै प्रतियोगिताबाट बाहिरिएको थियो । यसपटक भने उत्कृष्ट लय कायम राख्दै १६ वर्षपछि पुनः सेमिफाइनलमा पुग्न सफल भएको हो ।

यो स्पेनको विश्वकप इतिहासमा तेस्रो सेमिफाइनल यात्रा हो । यसअघि टोली १९५० र २०१० मा अन्तिम चारमा पुगेको थियो । २०१० मा स्पेन पहिलोपटक विश्वविजेता बनेको थियो भने १९५० मा चौथो स्थानमा सीमित भएको थियो ।

यता, बेल्जियमको विश्वकप यात्रा क्वार्टरफाइनलमै टुंगिएको छ । २०१८ मा तेस्रो स्थान हासिल गरेको बेल्जियम २०२२ मा समूह चरणबाटै बाहिरिएको थियो भने यसपटक अन्तिम आठभन्दा माथि उक्लिन सकेन ।

अब स्पेनले फाइनल प्रवेशका लागि सेमिफाइनलमा फ्रान्ससँग प्रतिस्पर्धा गर्नेछ ।