इस्लामावाद वार्ता निष्कर्षविहीन, अमेरिकी टोली स्वदेश फिर्ता

काठमाडौं । इरानसँगको वार्ताका लागि इस्लामावाद पुगेको अमेरिकी प्रतिनिधिमण्डल कुनै सहमति बिना नै स्वदेश फर्किएको छ । उपराष्ट्रपति जेडी भान्सको नेतृत्वमा रहेको टोलीले वार्ताबाट ठोस उपलब्धि हासिल गर्न नसकेको अन्तर्राष्ट्रिय सञ्चारमाध्यमहरूले जनाएका छन् ।

अमेरिकी अखबार द न्युयोर्क टाइम्सका अनुसार भान्स सवार एयरफोर्स टु इस्लामावादबाट उडान भर्ने तयारीमा थियो । प्रस्थानअघि होटल सेरेनामा आयोजित संक्षिप्त पत्रकार भेटमा उनले वार्ता निष्कर्षमा नपुगेको स्पष्ट पारे ।

भान्सका अनुसार इरानी पक्षले अमेरिकी प्रस्तावहरू स्वीकार गर्न तयार देखिएन । यद्यपि उनले कुन प्रस्तावहरू अस्वीकार गरियो भन्ने विवरण खुलाएनन् । उनले भने, अमेरिका आफ्ना सर्तहरूमा यथासम्भव लचिलो बनेको थियो र ‘रेड लाइन’हरू पनि स्पष्ट रूपमा राखिएको थियो ।

उनले वार्तालाई पूर्ण रूपमा असफल भने घोषणा नगरे पनि अमेरिका आफ्नो “अन्तिम र उत्कृष्ट प्रस्ताव” प्रस्तुत गरेर फर्किएको बताए । अब उक्त प्रस्ताव इरानले स्वीकार गर्छ कि गर्दैन भन्ने हेर्न बाँकी रहेको उनले उल्लेख गरे ।

वार्ताका क्रममा भान्सले अमेरिकी राष्ट्रपति डोनाल्ड ट्रम्पसँग पटक–पटक टेलिफोन संवाद गरेका थिए । अमेरिकी पक्षबाट विशेष दूत स्टिभ विटकफ र ज्यारेड कुश्नर सहभागी थिए भने इरानको तर्फबाट सभामुख मोहम्मद बाघेर गालीबाफ र विदेशमन्त्री अब्बास अरागची उपस्थित थिए ।