इन्टरनेटदेखि बैंकिङसम्मका २५ सेवा क्षेत्रमा हड्ताल प्रतिबन्ध

काठमाडौं । सरकारले इन्टरनेट, सञ्चार, बैंकिङ, स्वास्थ्यलगायत २५ वटा अत्यावश्यक सेवा क्षेत्रमा हड्ताल गर्न रोक लगाएको छ ।

जेठ २५ गते नेपाल राजपत्रमा सूचना प्रकाशित गर्दै सरकारले आवश्यक सेवा सञ्चालन ऐन, २०१४ को दफा ३ उपदफा (१) बमोजिम उक्त निर्णय लागू गरेको जनाएको हो । सूचनाअनुसार जनजीवन र सार्वजनिक सेवा प्रवाहमा प्रत्यक्ष असर पर्ने क्षेत्रलाई आवश्यक सेवाको सूचीमा राखेर हड्ताल निषेध गरिएको छ ।

प्रतिबन्धित सेवामा डाँक, तार तथा टेलिफोन सेवा, जल, स्थल र हवाई यातायातमार्फत यात्रु तथा मालसामान ढुवानी, सरकारी तथा सुरक्षा मुद्रणसम्बन्धी छापाखाना, सञ्चार सेवा, खानेपानी आपूर्ति, विद्युत् सेवा तथा पेट्रोलियम पदार्थको उत्पादन, भण्डारण र वितरण समावेश छन् ।

यस्तै अस्पताल तथा स्वास्थ्य सेवा, औषधिको उत्पादन र वितरण, फोहोरमैला व्यवस्थापन, बैंक तथा वित्तीय सेवा, बीमा सेवा, दैनिक उपभोग्य वस्तुको उत्पादन, आपूर्ति र वितरण, राहदानी तथा अन्य अत्यावश्यक सरकारी सेवामा पनि हड्ताल गर्न नपाइने व्यवस्था गरिएको छ ।

सरकारले सार्वजनिक हित र सेवा प्रवाहमा अवरोध हुन नदिन आवश्यक सेवाको निरन्तर सञ्चालन सुनिश्चित गर्न यस्तो निर्णय गरिएको जनाएको छ ।