चौधरीले नागरिक उन्मुक्ति पार्टीसँगको सम्बन्ध तोडे, नयाँ राजनीतिक यात्रा घोषणा

काठमाडौं । नागरिक उन्मुक्ति पार्टी (नाउपा) का संरक्षक रेशम चौधरीले आइतबार आफूले स्थापना गरेको पार्टीसँग सबै सम्बन्ध तोडेको घोषणा गरेका छन् । फेसबुक लाइभमार्फत भावुक हुँदै उनले अब नयाँ राजनीतिक यात्रा सुरु गर्ने बताएका हुन् ।

चौधरीले पार्टीभित्र बारम्बार ‘साधारण सदस्य पनि नभएको’ र ‘कानुनी हैसियत नभएको’ भन्दै अपमानित गरिएको गुनासो गर्दै यो कठोर निर्णय लिनु परेको बताए ।

फेसबुक लाइभमा उनले पार्टी स्थापनादेखि हालसम्म गरेका योगदानहरूको विस्तृत विवरण प्रस्तुत गरे । डिल्लीबजार कारागारमै रहँदा नेताहरुलाई तातो कफी खुवाएको, घरभाडा तिरेर वर्षौंसम्म साथ दिएको र किताब बेचेर, क्षतिपूर्तिबाट आएको रकम र निजी सम्पत्ति बेचेर पनि पार्टी सञ्चालनमा लगानी गरेको स्मरण गराए । तर, यति योगदानपछि पनि उल्टै अपमानित हुनुपरेको भन्दै उनले गहिरो पीडा व्यक्त गरे ।

उनका अनुसार, पछिल्लो बैठकमा उनलाई ‘कानुनी हैसियत नभएको व्यक्ति’ भन्दै सहभागी हुन रोकिएको थियो । यही कारणले उनले पार्टीबाट अलग हुने घोषणा गरे ।

‘आजदेखि म नागरिक उन्मुक्ति पार्टीमा छैन, अब म नयाँ अभियानमा छु,’ उनले भने ।

चौधरीले पार्टीभित्रको पद–प्रतिस्पर्धा, आन्तरिक विवाद र आफूप्रतिको व्यवहारबाट आजित भएको जनाए ।

‘कहिले २१ जनाको रोइलो, कहिले १६ जनाको रोइलो, कहिले मन्त्री चाहियो, कहिले संसदीय दलको नेता बदल्नुपर्ने भयो— म अब यी सबैबाट मुक्त हुन चाहन्छु,’ उनले भने ।

नयाँ पार्टी, पुरानै चुनाव चिह्नको दाबी
चौधरीले अब नागरिक उन्मुक्ति पार्टी नेपाल नामक नयाँ पार्टीको नेतृत्व गर्ने घोषणा गरे । उनले आफ्नो चुनाव चिह्न पनि पुरानै रहने दाबी गरे । निर्वाचन आयोगले स्वीकृति नदिएसम्म आफ्ना विचार र आवाज बोल्ने विश्वासिलो व्यक्तिलाई अगाडि सारेर राजनीति गर्ने योजनासमेत उनले सार्वजनिक गरे ।

उनले धनगढीका मेयर गोपाल हमाल र धरानका मेयर हर्क साम्पाङजस्ता स्वतन्त्र नेताहरूको संघर्ष नियालिरहेको र उनीहरूसँग हातेमालो गर्दै अघि बढ्ने इच्छा व्यक्त गरे । साथै, पुराना समर्थकहरूलाई नयाँ अभियानमा साथ दिन आह्वान गरे ।

चौधरीले नागरिक उन्मुक्ति पार्टीले राजबन्दी रिहाइमा खेलेको भूमिकाको प्रशंसा गर्दै अध्यक्ष रञ्जिता श्रेष्ठलगायतलाई धन्यवाद दिए । तर, पछिल्लो यात्रा दुःखद भएको भन्दै अब अलमलिन नचाहेको प्रस्ट पारे ।

‘धेरै अलमलिनुभन्दा बाटो बदल्नु नै बेस, आजसम्म साथ दिनुभयो, धेरै धेरै धन्यवाद,’ उनले भने ।

चार वर्षमै पार्टी परित्याग
टीकापुर घटनाको जगमा २०७८ फागुन ३ गते जेलमै रहँदा चौधरीले नागरिक उन्मुक्ति पार्टी खोलेका थिए । छोटो अवधिमै पार्टी कैलालीमा ठूलो शक्ति बनेर उदायो । संघीय संसदमा तीन र प्रदेश सभामा पाँच सिट जितेर पार्टीले प्रभाव जमाएको थियो । तर, आन्तरिक विवाद र असहमतिको कारण चौधरीले स्थापना गरेको पार्टी खुलेको चार वर्षमै छोडेका छन् ।