नौबिसे–मुग्लिन सडकखण्ड पनि पहिरोका कारण राजमार्ग पूर्णरूपमा अवरुद्ध

काठमाडौं । नौबिसे–मुग्लिन सडकखण्ड अन्तर्गत दुई फरक स्थानमा खसेको ठूलो पहिरोका कारण प्रमुख राजमार्ग पूर्ण रूपमा अवरुद्ध भएको छ । धादिङ जिल्लाको धुनिवेशी नगरपालिका–१ स्थित ठूलोखोला (धार्के–सितापाइला सडकखण्ड) र बेनिघाट रोराङ गाउँपालिका–१० को बादरेमोडमा खसेको पहिरोले सडक बन्द भएको हो ।

धादिङ प्रहरीका अनुसार बुधबार राति पौने ९ बजे ठूलोखोलामा पहिलो पहिरो खसेको थियो भने बादरेमोडमा खसेको पहिरो अझ ठूलो र जटिल भएकोले तत्काल पन्छाउन सक्ने अवस्था छैन ।

‘बादरेमोडको पहिरो ठूलो छ, भोलि बिहान नभएसम्म सडक खुल्ने सम्भावना नरहेको प्रहरीले जनाएको छ ।

सडक अवरुद्ध भएपछि यात्रुहरू बीच बाटोमै अलपत्र परेका छन् । प्रहरी र स्थानीय प्रशासनले हाललाई वैकल्पिक मार्ग प्रयोग गर्न यात्रुहरूलाई आग्रह गरेका छन् ।

यसैबीच, मुग्लिन–नारायणगढ सडकखण्डको तुइन खोलामा पहिल्यैदेखि खसेको पहिरो अझै नपन्छाइएकाले सो क्षेत्रको आवागमनसमेत ठप्प भएको छ ।

चाडपर्वको पूर्वसन्ध्यामा मुख्य राजमार्गहरू अवरुद्ध हुँदा यात्रुहरू लामो समयदेखि बाटोमै रोकिएका छन् ।