पोखराबाट काठमाडौं आउँदै गरेको बस धादिङ दुर्घटना, १७ को मृत्यु, २४ घाइते

काठमाडौं । धादिङ जिल्लामा सोमबार बिहान भएको भीषण बस दुर्घटनामा १७ जनाको ज्यान गएको छ भने २४ जना घाइते भएका छन् ।

पोखराबाट काठमाडौँतर्फ आउँदै गरेको ग १ ख १४२१ नम्बरको यात्रुवाहक बस सोमबार बिहान करिब १ः३० बजे पृथ्वी लोकमार्गअन्तर्गत बेनिघाट रोराङ गाउँपालिका–५ भैंसीगौडामा दुर्घटनामा परेको हो । बस त्रिशूली नदीमा खस्दा ठूलो मानवीय क्षति भएको प्रहरीले जनाएको छ ।

दुर्घटनाको खबर पाएलगत्तै सशस्त्र प्रहरी बल नेपालको विपद् व्यवस्थापन बेस आदमघाटबाट डीएसपी सुनिल गिरीको नेतृत्वमा उद्धार टोली परिचालन गरिएको थियो । साथै विपद् व्यवस्थापन तालिम शिक्षालय, कुरिनटारबाट गोताखोरसहितको विशेष टोलीसमेत घटनास्थलमा खटिएको सशस्त्र प्रहरी बल नेपालका प्रवक्ता डिआइजी विष्णु प्रसाद भट्टले जानकारी दिए ।

प्रवक्ता भट्टका अनुसार १७ जनाको शव घटनास्थलमै फेला परेको छ । घाइते २४ जनालाई उद्धार गरी नजिकका विभिन्न अस्पतालमा उपचारका लागि पठाइएको छ । मृतक तथा घाइतेहरूको पहिचान गर्ने काम जारी रहेको छ ।

दुर्घटनाको कारण भने हालसम्म खुल्न सकेको छैन । घटनास्थलमा नेपाल प्रहरी, सशस्त्र प्रहरी र नेपाली सेनासहित तीनवटै सुरक्षा निकायको समन्वयमा उद्धार तथा खोजी कार्य भइरहेको छ ।