बीपी राजमार्गमा घिसिङको निरीक्षण, अस्थायी ट्रयाक शुक्रबारसम्म बनाउन निर्देशन

काठमाडौं । भदौ १८ गतेको भीषण बाढीपहिरोले क्षतिग्रस्त बनेको बीपी राजमार्गको अवस्था भौतिक पूर्वाधार तथा यातायातमन्त्री कुलमान घिसिङले प्रत्यक्ष अवलोकन गरेका छन् ।

बिहीबार बिहान मन्त्री घिसिङ मन्त्रालयका सचिव केशव शर्मा र सडक विभागका महानिर्देशक विजय जैसीसहित बीपी राजमार्गको भकुन्डे–नेपालथोक सडक खण्ड अन्तर्गत काभ्रेको चौकीडाँडा पुगेका थिए ।

अनुगमनका क्रममा मन्त्री घिसिङले बाढीपहिरोले बगाएको करिब चार किलोमिटर सडक क्षेत्रमा तत्काल अस्थायी ट्रयाक तयार गर्न निर्देशन दिएका छन् । उनले शुक्रबार साँझसम्म अस्थायी सडक तयार गरी सवारी सञ्चालनमा ल्याउन आदेश दिएका हुन् ।

बाढीपहिरोले सडकका विभिन्न भाग बगाएपछि अहिले उक्त क्षेत्रमा सवारी आवागमन ठप्प भएको छ । सरकारले यात्रुहरूलाई सहज बनाउन अस्थायी डाइभर्सनमार्फत आवागमन पुनः सुरु गर्ने तयारी गरेको छ ।

संघीय राजधानी काठमाडौंलाई पूर्वी नेपालसँग जोड्ने बीपी राजमार्ग अहिले चाडपर्वको समयमा बन्द हुँदा हजारौँ यात्रुहरू सास्तीमा परेका छन् । यस राजमार्गलाई बागमती, मधेस र कोसी प्रदेशलाई जोड्ने ‘लाइफलाइन’ सडक मानिन्छ ।

गत वर्षको बाढीले पनि सोही खण्डमा ठुलो क्षति पुर्याएको थियो । त्यतिबेला अस्थायी डाइभर्सन बनाएर सवारी सञ्चालन गरिएको भए पनि यस वर्ष पुनः बाढीले चार किलोमिटर सडक पूर्णरूपमा बगाएको छ ।

सडक विभागका अनुसार गत वर्ष क्षति पुगेका केही खण्डको स्थायी पुनर्निर्माणका लागि ठेक्का प्रक्रिया अघि बढिसकेको छ भने बाँकी भागका लागि सम्झौता अन्तिम चरणमा पुगेको छ ।

मन्त्री घिसिङले सडक पुनः सञ्चालनमा ल्याउने कार्यलाई प्राथमिकतामा राख्ने प्रतिबद्धता जनाउँदै भने, ‘चाडपर्वमा जनतालाई सास्ती नहोस् भनेर कुनै पनि हालतमा शुक्रबारसम्म अस्थायी ट्रयाक तयार पार्नेछौँ ।’