मधेशपछि कोशीमा पनि सत्ता फेरबदलको संकेत, एमाले–कांग्रेसबीच नेतृत्व विवाद चर्किदै

काठमाडौं । कोशी प्रदेशमा सत्ता समीकरण परिवर्तन हुने चर्चा तीव्र बनेको छ । मधेश प्रदेशमा हालै भएको राजनीतिक फेरबदलपछि त्यसको प्रभाव कोशी प्रदेश राजनीतिमा समेत देखिन थालेको हो । अहिले कोशीमा रहेको नेकपा एमाले–नेपाली कांग्रेस गठबन्धनभित्र अब सरकारको नेतृत्व कसले गर्ने भन्ने विषयमा विवाद सतहमा आएको छ ।

मधेश प्रदेशमा जेठ ७ गते जनता समाजवादी पार्टी नेपालका मन्त्रीहरूलाई सरकारबाट बाहिर निकालेर एमालेलाई सरकारमा सहभागी गराइएपछि नयाँ राजनीतिक समीकरण बनेको थियो । त्यसको केही दिनमै कोशी प्रदेशमा पनि नेतृत्व परिवर्तनको बहस सुरु भएको हो ।

हाल कोशी प्रदेश सरकारको नेतृत्व एमाले सचिवसमेत रहेका हिक्मतकुमार कार्कीले गरिरहेका छन् । तर कांग्रेसभित्र अब सरकारको नेतृत्व आफ्नो पार्टीले पाउनुपर्ने आवाज बलियो बन्दै गएको छ । कांग्रेस उपसभापति विश्वप्रकाश शर्माले सुनसरीमा आयोजित कार्यक्रममा कोशीमा चाँडै सत्ता परिवर्तन हुने र नयाँ सरकार कांग्रेस नेतृत्वमा बन्ने दाबी गरेका थिए ।

यद्यपि एमाले भने मुख्यमन्त्री पद कांग्रेसलाई सहजै छाड्ने मनस्थितिमा देखिएको छैन । पार्टीभित्र अध्यक्ष केपी शर्मा ओली भने नेतृत्व परिवर्तन गर्न सकिने तर सरकारको नेतृत्व एमालेकै हातमा रहनुपर्ने पक्षमा रहेको चर्चा छ । एमाले स्रोतका अनुसार ओली हालका मुख्यमन्त्री कार्कीको विकल्प खोज्ने पक्षमा देखिएका छन् ।

यसैबीच सम्भावित सत्ता परिवर्तनको चर्चा चुलिएका बेला मुख्यमन्त्री कार्कीले हतारमा नीति तथा कार्यक्रम ल्याएको भन्दै आलोचना समेत सुरु भएको छ । विगतमा सरकारले नीति तथा कार्यक्रम अघि बढाउनुअघि प्रतिपक्षी दल र संसदीय समितिसँग सुझाव लिने अभ्यास गर्दै आएको भए पनि यस पटक त्यस्तो प्रक्रिया अपनाइएको छैन ।

कांग्रेस नेताहरूले बजेट प्रस्तुत हुनुअघि नै सरकार परिवर्तन गर्नुपर्ने रणनीति बनाएको बताइरहेका छन् । प्रदेशसभामा असार १ गतेअघि बजेट ल्याउन नपाइने संवैधानिक व्यवस्थाका बीच मुख्यमन्त्रीले भने जेठ ७ गते नै नीति तथा कार्यक्रम सार्वजनिक गरेका थिए । यसलाई सत्ता जोगाउने प्रयासका रूपमा पनि हेरिएको छ ।

प्रमुख प्रतिपक्षी दल नेकपा माओवादी केन्द्रका नेता इन्द्रबहादुर आङ्बोले पनि सरकारले आवश्यक परामर्शबिना नीति तथा कार्यक्रम ल्याएको टिप्पणी गरेका छन् । उनले अहिलेको अवस्थामा आफ्नो दल प्रतिपक्षमै रहने स्पष्ट पारे ।

एमालेभित्र भने मुख्यमन्त्री परिवर्तनबारे आन्तरिक छलफल भइरहेको संकेत देखिएको छ । संसदीय दलका उपनेता तिलकुमार मेन्याङ्बो लाई सम्भावित विकल्पका रूपमा अघि सार्ने तयारी भइरहेको चर्चा छ । अर्कोतर्फ कांग्रेसले संसदीय दलका नेता उद्धव थापा लाई मुख्यमन्त्रीको दाबेदार बनाएको छ ।

फागुन २१ को प्रतिनिधिसभा निर्वाचनपछि एमाले अध्यक्ष ओली र मुख्यमन्त्री कार्कीबीच सम्बन्ध चिसिएको चर्चा पनि प्रदेश राजनीतिमा जोडिएको छ । ओलीको गृह क्षेत्रमा आएको कमजोर चुनावी परिणामपछि कार्कीमाथि पार्टीभित्रै असन्तुष्टि बढेको बताइन्छ । यही कारण आगामी दिनमा कोशी प्रदेशको सत्ता समीकरण अझै रोचक बन्न सक्ने आँकलन गरिएको छ ।