प्रतिनिधि सभा निर्वाचनका लागि तीन दिन सार्वजनिक बिदा घोषणा

काठमाडौं । सरकारले आगामी प्रतिनिधि सभा निर्वाचनलाई लक्षित गर्दै तीन दिन सार्वजनिक बिदा दिने निर्णय गरेको छ । मंगलबार बसेको मन्त्रिपरिषद् बैठकले उक्त निर्णय गरेको सरकारका प्रवक्ता तथा गृहमन्त्री ओमप्रकाश अर्यालले जानकारी दिएका छन् ।

यसअघि निर्वाचन आयोगले चुनावको तयारी र मतदानलाई सहज बनाउन २०, २१ र २२ गते सार्वजनिक बिदा दिन सरकारसमक्ष सिफारिस गरेको थियो । सोही सिफारिसअनुसार मन्त्रिपरिषद्ले तीन दिन बिदा स्वीकृत गरेको हो ।

प्रतिनिधि सभा निर्वाचनअन्तर्गत फागुन २१ गते मतदान हुने तय भएको छ । निर्वाचनका कारण औपचारिक रूपमा तीन दिन बिदा भए पनि अन्य पर्व तथा अवसरका कारण यसपटक झन्डै एक सातासम्म सार्वजनिक बिदाको अवस्था सिर्जना हुने भएको छ ।

फागुन १८ गते पहाडी क्षेत्रमा र १९ गते तराई क्षेत्रमा होली पर्व परेको छ । त्यसपछि २३ गते शनिबार र २४ गते आइतबार अन्तर्राष्ट्रिय महिला दिवस पनि मनाइने भएकाले निर्वाचन आसपासको अवधि लामो बिदामा परिणत हुने देखिएको छ ।

यसरी निर्वाचनको समयावधिमा देशभर झन्डै एक साता सार्वजनिक बिदा हुने अवस्था बनेको छ ।