गणतन्त्र दिवसमा चार पत्रकार सम्मानित, जनही ५० हजार पुरस्कार

मकवानपुर । बागमती प्रदेश सरकारले गणतन्त्र दिवसको अवसर पारेर विभिन्न विधामा योगदान पुर्‍याएका चार पत्रकारलाई सम्मान गरेको छ । शुक्रबार हेटौँडामा आयोजित विशेष समारोहमा उनीहरूलाई नगदसहित पत्रकारिता पुरस्कार प्रदान गरिएको हो ।

प्रदेश सरकारले विकास पत्रकारिता पुरस्कार नेपालखबरकी बागमती प्रदेश संवाददाता सुनिता विष्टलाई प्रदान गरेको छ । त्यस्तै खोज पत्रकारिता पुरस्कार नयाँ पत्रिकाका पोष्टराज अधिकारी, सुशासन पत्रकारिता पुरस्कार रामेछापका पत्रकार युवराज श्रेष्ठ तथा संस्थागत पत्रकारिता पुरस्कार ललितपुरका रामहरी कार्कीलाई प्रदान गरिएको हो ।

सम्मानित पत्रकारहरूलाई जनही ५० हजार रुपैयाँ नगदसहित पुरस्कृत गरिएको प्रदेश सरकारले जनाएको छ । पत्रकारितामार्फत गणतन्त्रको सुदृढीकरण, सुशासन प्रवर्द्धन, विकास निर्माण तथा नागरिकमा सूचना प्रवाहमा पुर्‍याएको योगदानको कदरस्वरूप पुरस्कार प्रदान गरिएको बताइएको छ ।

उक्त कार्यक्रममा गणतन्त्र दिवसको अवसरमा आयोजित निबन्ध लेखन तथा खुला दौड प्रतियोगिताका विजेताहरूलाई पनि पुरस्कार वितरण गरिएको थियो ।