साउनमा मुद्रास्फीति ५.९६ प्रतिशत पुग्यो, ग्रामीण क्षेत्रमा महँगी उच्च

काठमाडौं । चालु आर्थिक वर्ष २०८३/८४ को पहिलो महिना साउनमा नेपालमा वार्षिक बिन्दुगत उपभोक्ता मुद्रास्फीति ५.९६ प्रतिशत पुगेको छ । गत आर्थिक वर्षको साउनमा यस्तो मुद्रास्फीति १.६८ प्रतिशत मात्र रहेको थियो ।

नेपाल राष्ट्र बैंकले शुक्रबार सार्वजनिक गरेको देशको वर्तमान आर्थिक तथा वित्तीय स्थिति प्रतिवेदनअनुसार खाद्यान्न तथा पेय पदार्थ र गैरखाद्य वस्तु तथा सेवाको मूल्यवृद्धिका कारण समग्र मुद्रास्फीति बढेको हो ।

प्रतिवेदनअनुसार खाद्य तथा पेय पदार्थ समूहको मुद्रास्फीति ६.७७ प्रतिशत पुगेको छ । यस समूहमा सबैभन्दा बढी घिउ तथा तेलको मूल्य १५.६२ प्रतिशतले बढेको छ । त्यस्तै फलफूलको मूल्य १५.३९ प्रतिशत, माछा तथा मासुको ८.६५ प्रतिशत, तरकारीको ६.९० प्रतिशत र मरमसलाको मूल्य ४.८० प्रतिशतले वृद्धि भएको छ ।

गैरखाद्य तथा सेवा समूहमा वार्षिक मुद्रास्फीति ५.५२ प्रतिशत रहेको राष्ट्र बैंकले जनाएको छ । यस समूहअन्तर्गत यातायात क्षेत्रमा सबैभन्दा उच्च १३.१७ प्रतिशत मूल्यवृद्धि भएको छ । मदिराजन्य पदार्थको मूल्य ७.२० प्रतिशत, कपडा तथा जुत्ताचप्पलको ५.५२ प्रतिशत र सुर्तीजन्य वस्तुको मूल्य ४.९७ प्रतिशतले बढेको छ ।

राष्ट्र बैंकको तथ्यांकले सहरी क्षेत्रको तुलनामा ग्रामीण क्षेत्रमा महँगीको दर बढी रहेको देखाएको छ । साउनमा ग्रामीण क्षेत्रको उपभोक्ता मूल्य सूचकांक ६.१८ प्रतिशतले बढ्दा सहरी क्षेत्रमा ५.८८ प्रतिशत वृद्धि भएको छ ।

प्रदेशगत रूपमा मधेस प्रदेशमा सबैभन्दा बढी ६.९४ प्रतिशत मुद्रास्फीति कायम भएको छ । सुदूरपश्चिम प्रदेशमा भने मुद्रास्फीति ४.६१ प्रतिशत रहेको छ ।

भौगोलिक क्षेत्रअनुसार तराईमा ६.६४ प्रतिशत, पहाडमा ५.९५ प्रतिशत, हिमालमा ५.१० प्रतिशत र काठमाडौं उपत्यकामा ४.८१ प्रतिशतले उपभोक्ता मूल्य वृद्धि भएको राष्ट्र बैंकको प्रतिवेदनमा उल्लेख छ ।