एमाले विधान महाधिवेशनमा २३९२ सहभागी हुने, तयारी तीव्र

काठमाडौं । नेकपा एमालेले भदौ २० देखि २२ गतेसम्म आयोजना गर्न लागेको दोस्रो विधान महाधिवेशनमा कुल २३९२ जना सहभागी हुने भएका छन् । पार्टी केन्द्रीय कार्यालय च्यासलमा बसेको मूल व्यवस्थापन समितिको बैठकमा संगठन विभागले पेश गरेको प्रतिवेदनमा सहभागी संख्या उल्लेख गरिएको हो ।

पार्टी प्रचार विभाग प्रमुख राजेन्द्र गौतमका अनुसार प्रतिनिधि संख्या २१२८ र आयोजक टोलीमा २६४ हुनेछन् । २०७८ मा चितवनमा सम्पन्न १०औँ महाधिवेशनका प्रतिनिधिहरू नै यस विधान महाधिवेशनका प्रतिनिधि हुने भएकाले केही केन्द्रीय सदस्य समेत आयोजक भूमिकामा रहनेछन् ।

महाधिवेशनलाई व्यवस्थित बनाउन विभिन्न तयारी गरिएका छन् । सातदोबाटोदेखि गोदावरीस्थित सनराइज हलसम्म बागमती प्रदेश, ललितपुर जिल्ला कमिटी तथा विभिन्न जनसङ्गठनहरूको तर्फबाट स्वागतद्वारहरू राखिनेछ । कार्यक्रमस्थलमा कम्तीमा ३ सय स्वयंसेवक परिचालन गरिँदैछ भने युवा संघ र खेलकुद महासंघले जिम्मेवारी लिएका छन् ।

सञ्चारकर्मीको रिपोर्टिङलाई सहज बनाउन महाधिवेशन स्थलमा व्यवस्थित न्यूज डेस्क र मिडिया पासको व्यवस्था रहनेछ । प्रतिनिधिहरूलाई डिजिटल कार्ड उपलब्ध गराइनेछ ।

एमालेले महाधिवेशनको मूल नारा छिट्टै सार्वजनिक गर्ने तयारी गरेको छ भने बैठकले सामाजिक सञ्जालमार्फत प्रचार अभियान तीव्र बनाउने निर्णय गरेको छ । सहभागी प्रतिनिधिबाट कुनै शुल्क नलिइने र आवास व्यवस्थापन भने उनीहरूले आफैं गर्नुपर्नेछ ।

कार्यक्रम अवधिभर स्वास्थ्य सुविधा उपलब्ध गराउन तीन सिफ्टमा चिकित्सकसहित डेस्क राखिनेछ । सातदोबाटोबाट गोदावरीसम्म पुग्न सार्वजनिक यातायातको व्यवस्था पार्टीका विभिन्न कमिटीहरूले मिलाउनेछन् ।

महाधिवेशनमा अध्यक्ष केपी शर्मा ओलीले राजनीतिक प्रतिवेदन, उपाध्यक्ष विष्णुप्रसाद पौडेलले विधान संशोधन प्रस्ताव र महासचिव शङ्कर पोखरेलले सांगठनिक प्रतिवेदन प्रस्तुत गर्नेछन् । महासचिव पोखरेलले यो महाधिवेशन एमालेलाई अझ एकताबद्ध बनाउने अवसर भएको बताउँदै सबैलाई गम्भीर भएर जिम्मेवारी सम्हाल्न निर्देशन दिएका छन् ।

एमालेले आजदेखि विधान महाधिवेशनको ‘काउन्टडाउन’ सुरु गर्दैछ । महाधिवेशन हुन अझ १९ दिन बाँकी छन् ।