पपुलिस्ट राजनीति लोकतन्त्रविरुद्ध प्रयोग भइरहेको प्रचण्डको आरोप

काठमाडौं । नेपाली कम्युनिष्ट पार्टी (नेकपा) का संयोजक तथा पूर्वप्रधानमन्त्री पुष्पकमल दाहाल ‘प्रचण्ड’ले देशका लागि ठोस योगदान नगरेकाहरू सामाजिक सञ्जालको प्रयोग गरेर राजनीतिक लाभ लिन खोजिरहेको टिप्पणी गरेका छन् ।

सोमबार बिहान काठमाडौं क्षेत्र नम्बर ५ मा आयोजित पार्टी प्रवेश कार्यक्रमलाई सम्बोधन गर्दै प्रचण्डले पछिल्लो समय नेपालमा लोकप्रियतावाद (पपुलिज्म) बढ्दै गएको उल्लेख गरे । उनले सामाजिक सञ्जालमा देखावटी गतिविधि गरेर राजनीतिमा स्थापित हुन खोज्ने प्रवृत्ति बढेको बताएका हुन् ।

उनका अनुसार विश्वका विभिन्न देशमा साम्राज्यवादी शक्तिहरूले लोकतन्त्र र समाजवादविरुद्ध प्रहार गर्न पपुलिस्ट शक्तिहरूलाई प्रयोग गर्ने गरेको दाबी गरे । नेपालमा पनि भूराजनीतिक चलखेलमार्फत हस्तक्षेप गर्ने प्रयास भइरहेको उनको भनाइ थियो ।

प्रचण्डले राष्ट्रिय स्वतन्त्र पार्टी (रास्वपा)तर्फ संकेत गर्दै पपुलिस्ट शक्तिहरू विदेशी स्वार्थका लागि प्रयोग हुने पात्र बन्न सक्ने चेतावनी दिए । साथै, २६ घटक मिलेर बनेको नेकपा आगामी दिनमा देशकै सबैभन्दा ठूलो राजनीतिक शक्ति बन्ने दाबीसमेत उनले गरे ।