भारतीय विदेश सचिव मिस्रीद्वारा प्रधानमन्त्री ओलीलाई नयाँ दिल्ली यात्राको निम्ता

काठमाडौं । भारतीय प्रधानमन्त्री नरेन्द्र मोदीले प्रधानमन्त्री केपी शर्मा ओलीलाई दुई दिने औपचारिक भारत भ्रमणको निमन्त्रणा पठाएका छन् । उक्त सन्देश भारतीय विदेश सचिव विक्रम मिस्रीले आइतबार बिहान बालुवाटारमा प्रधानमन्त्री ओलीलाई हस्तान्तरण गरेका हुन् ।

प्रधानमन्त्रीका प्रमुख सल्लाहकार विष्णु रिमालका अनुसार प्रधानमन्त्री ओलीले उक्त निमन्त्रणा स्वीकार गरिसकेका छन् । उनले भने, “अब भ्रमणको मिति, स्थान र प्रमुख एजेन्डाहरू नेपाल–भारत परराष्ट्र संवादका माध्यमबाट टुंगो लगाएर सार्वजनिक गरिनेछ ।”

बालुवाटारमा ओली र मिस्रीबीच करिब एक घण्टा शिष्टाचार भेट भएको थियो । भेटमा दुई देशबीचको कनेक्टिभिटी, ऊर्जा साझेदारी, व्यापार तथा सीमा सहकार्यका विषयमा प्रारम्भिक छलफल भएको बताइएको छ ।

भारतीय विदेश सचिव मिस्री प्रधानमन्त्री मोदीको विशेष सन्देश लिएर आइतबार बिहानै काठमाडौँ आएका हुन् । नेपाल बसाइका क्रममा उनले परराष्ट्र मन्त्री आरजु राणा देउवा, राष्ट्रपति रामचन्द्र पौडेललगायतसँग पनि भेट गर्ने कार्यक्रम तय भएको छ ।

मिस्री सोमबार स्वदेश फर्किनुअघि पशुपतिनाथ मन्दिरमा पूजा गर्नेछन् । प्रधानमन्त्री ओली आगामी भदौ ३१ देखि असोज १ गतेभित्र भ्रमणमा जानसक्ने अनुमान गरिएको छ, यद्यपि मिति औपचारिक रूपमा घोषणा भएपनि बाँकी छ ।