रोनाल्डोको दुई गोल, उज्वेकिस्तानमाथि पोर्चुगलको फराकिलो जित

काठमाडौं । फिफा विश्वकप २०२६ अन्तर्गत भएको समूह चरणको खेलमा पोर्चुगलले उज्वेकिस्तानलाई ५–० गोलअन्तरले पराजित गर्दै नकआउट चरण पुग्ने सम्भावना बलियो बनाएको छ ।

अमेरिकाको ह्युस्टनमा गएराति सम्पन्न खेलमा कप्तान क्रिस्टियानो रोनाल्डो नायक बने । उनले दुई गोल गर्दै टोलीको सहज जितमा महत्वपूर्ण योगदान दिए ।

रोनाल्डोले खेलको छैटौँ मिनेटमै जाओ कान्सेलोको पासमा गोल गर्दै पोर्चुगललाई अग्रता दिलाएका थिए । उक्त गोलसँगै उनी विश्वकपका ६ फरक संस्करणमा गोल गर्ने पहिलो खेलाडी बनेका छन् ।

पोर्चुगलले १७औँ मिनेटमा नुनो मेन्डेजको उत्कृष्ट फ्रिकिक गोलमार्फत अग्रता दोब्बर बनायो । त्यसपछि ३९औँ मिनेटमा रोनाल्डोले व्यक्तिगत दोस्रो तथा टोलीका लागि तेस्रो गोल गरे ।

विश्वकपमा रोनाल्डोको यो १०औँ गोल हो । यससँगै उनले पोर्चुगलका महान् पूर्वखेलाडी इसेबाउको ९ गोलको कीर्तिमानलाई पछि पारेका छन् ।

दोस्रो हाफमा उज्वेकिस्तानमाथि दबाब कायम राखेको पोर्चुगलले ६०औँ मिनेटमा विपक्षी खेलाडी नेमाटोभको आत्मघाती गोलबाट चौथो सफलता प्राप्त गर्‍यो । खेलको अन्त्यतिर वैकल्पिक खेलाडी राफेल लिओले ८७औँ मिनेटमा गोल गर्दै पोर्चुगलको जितलाई ५–० मा पुर्‍याए ।

यसअघि पहिलो खेलमा डीआर कंगोसँग गोलरहित बराबरी खेलेको पोर्चुगलले दोस्रो खेलमा प्रभावशाली प्रदर्शन गर्दै महत्वपूर्ण तीन अंक जोडेको हो ।

यता, पहिलो पटक विश्वकप खेलिरहेको उज्वेकिस्तान भने लगातार दोस्रो हारपछि समूह चरणबाट बाहिरिने खतारामा पुगेको छ । उसले अब आफ्नो अन्तिम समूह खेलमा डीआर कंगोसँग प्रतिस्पर्धा गर्नेछ ।