लाइसेन्स सेवामा पूर्ण अवरोध, आजदेखि सबै प्रक्रिया ठप्प

काठमाडौं । सवारी चालक अनुमति पत्र (लाइसेन्स) सम्बन्धी सम्पूर्ण सेवा आज (असार २० गते शुक्रबार) देखि अनिश्चितकालका लागि स्थगित गरिएको छ । यातायात व्यवस्था विभागले एक सार्वजनिक सूचना जारी गर्दै प्रणालीमा आएको प्राविधिक गडबडीका कारण सबै सेवा बन्द गरिएको जानकारी दिएको हो ।

विभागद्वारा प्रकाशित सूचनामा उल्लेख छ, ‘सवारी चालक अनुमतिपत्रसम्बन्धी ईडीएल प्रणाली, अनलाइन आवेदन फारम तथा अत्यावश्यक सेवा समेत हालका लागि बन्द गरिएको छ ।’

विभागका अनुसार समस्या समाधानको प्रयास भइरहेको छ भने सेवा पुनः सुचारु हुने मिति अर्को सूचना मार्फत जानकारी गराइनेछ ।