एकताका साथ पार्टी अघि बढाउने ओलीको आह्वान

काठमान्डु । नेपाल कम्युनिष्ट पार्टी (एमाले) का अध्यक्ष केपी शर्मा ओलीले पार्टीभित्र एकताको भावना सुदृढ गर्दै अघि बढ्ने प्रतिबद्धता व्यक्त गरेका छन् । ११औँ महाधिवेशनबाट तेस्रो कार्यकालका लागि अध्यक्ष निर्वाचित भएपछि बसेको पहिलो केन्द्रीय कमिटी बैठकमा बोल्दै उनले पार्टीलाई नयाँ उचाइमा पुर्‍याउने लक्ष्यसहित सामूहिक रूपमा अघि बढ्न आग्रह गरे ।

अध्यक्ष ओलीले पार्टीभित्र कहिलेकाहीँ देखिने समस्याप्रति संकेत गर्दै आगामी दिनमा यस्ता कमजोरी दोहोरिन नदिन सबै सचेत हुनुपर्ने बताए । “हाम्रो एक आवाज हुनुपर्छ,” उनले भने, “विधान महाधिवेशनले पारित गरेका वैचारिक, संगठनात्मक र कार्यक्रमिक नीतिअनुसार एक स्वरमा अघि बढ्नेछौँ ।”

उनले पार्टीको कदमलाई अनुशासित र तालमेलयुक्त बनाउन आर्मीको परेडसँग तुलना गर्दै सबै नेताकार्यकर्ता एउटै तालमा अघि बढ्नुपर्ने धारणा राखे । “हात पनि बराबर हल्लिने, खुट्टा पनि बराबर चल्ने गरी ताल मिलाएर अघि बढ्नुपर्छ,” ओलीको भनाइ थियो ।

बैठकमा अध्यक्ष ओलीले टोल–टोलमा सुरक्षा समिति गठन गरी आम जनताको सुरक्षामा सक्रिय भूमिका खेल्न पार्टीका नेता तथा कार्यकर्तालाई निर्देशनसमेत दिएका छन् ।