उज्यालो नेपाल पार्टीको घोषणा सभा मंसिर १७ मा, प्रमुख वक्तामा कुलमान घिसिङ

काठमाडौं । नवगठित उज्यालो नेपाल पार्टीले आफ्नो घोषणा सभा आगामी मंसिर १७ गते, बुधबार काठमाडौंको प्रज्ञा भवनमा आयोजना गर्ने भएको छ । शुक्रबार काठमाडौंमा आयोजित पत्रकार सम्मेलनमार्फत पार्टीका प्रवक्ता डा. राजु थापाले उक्त जानकारी दिएका हुन् ।

घोषणा सभामा ऊर्जा, जलस्रोत तथा सिंचाइ मन्त्री कुलमान घिसिङ प्रमुख वक्ताका रूपमा उपस्थित रहनेछन् । सो अवसरमा पार्टीको दीर्घकालीन दृष्टि, मूल ध्येय र विस्तृत घोषणा पत्र–२०८२ औपचारिक रूपमा सार्वजनिक गरिने प्रवक्ता थापाले बताए ।

उनका अनुसार घोषणा पत्रमा पार्टीको सैद्धान्तिक आधार, प्राथमिकता तथा कार्ययोजना स्पष्ट रूपमा प्रस्तुत गरिनेछ । पार्टीका नेताहरूले पत्रकार सम्मेलनमा उज्यालो नेपाल पार्टीले लोकतान्त्रिक समाजवादलाई मार्गदर्शक सिद्धान्तका रूपमा अपनाएर अघि बढ्ने बताए ।

प्रवक्ता थापाले सबै दलका सकारात्मक पक्षहरू आत्मसात गर्दै देश विकासका लागि नयाँ दृष्टिकोणसहित पार्टीले यात्रा सुरू गरेको उल्लेख गरे ।

केही हप्ताअघि उज्यालो नेपाल पार्टी निर्वाचन आयोगमा दर्ता भइसकेको छ ।