रोहित पौडेलको शतक पनि व्यर्थ, नेपाल फेरि पराजित

काठमाडौं । कप्तान रोहित पौडेलको शानदार शतकले पनि नेपाललाई जित दिलाउन सकेन । दुबईमा जारी आईसीसी पुरुष क्रिकेट विश्वकप लिग-२ अन्तर्गत बिहीबार भएको खेलमा नेपालले यूएईसँग पाँच विकेटको हार व्यहोरेको छ ।

यसअघि अमेरिकासँग पनि पराजित भएको नेपालले लगातार दोस्रो हारको सामना गरेको हो ।

२३४ रनको लक्ष्य पछ्याउँदै मैदानमा उत्रिएको यूएईले ४३.३ ओभरमै २३७ रन बनाउँदै जित दर्ता गर्‍यो । टीमका ओपनर आर्यांश शर्माले ९८ रनको शानदार इनिङ खेले भने एलिशान शराफुले ४५ रनको योगदान दिए । अन्य खेलाडीमध्ये मुहम्मद वसीमले २६, राहुल चोपडाले १५, हर्षित कौशिकले १३ रन बनाए ।अन्त्यतिर ध्रुव पराशर (१६) र जाहिद अली (६) नटआउट रहे ।

नेपालका बलरहरूबाट सन्दीप लामिछानेले २ विकेट, करण केसी र दीपेन्द्र सिंह ऐरीले समान १–१ विकेट लिए भने अन्य बलरहरू विकेटविहीन रहे ।

यसअघि टस जितेर पहिले ब्याटिङ गरेको नेपालले ५० ओभरमा सबै विकेट गुमाउँदै २३३ रन मात्रै बनायो । कप्तान रोहित पौडेलले कप्तानी इनिङ खेल्दै १२९ बलमा १०९ रन बनाए । उनले १२६ बलमा आफ्नो शतक पूरा गरेका थिए ।

आसिफ शेखले ३५ रन, आरिफ शेखले २७ रन, दीपेन्द्र सिंह ऐरीले २३ रनको योगदा गरे । त्यस्तै कुशल भुर्तेल (७), भीम सार्की (३), गुल्सन झा (०), सोमपाल कामी (६), करण केसी (१३) ले अपेक्षित प्रदर्शन गर्न सकेनन् ।

यूएईका लागि जाहिद अलीले ४ विकेट, जुनैद सिद्दिकीले ३ विकेट, र मुहम्मद रोहिद तथा हैदर अलीले १–१ विकेट लिए ।

यो जितपछि यूएईले १८ खेलबाट ८ अंक हासिल गर्दै अन्तिम स्थानमै रहेको छ । नेपालले १८ खेलमा ५ जितका साथ १२ अंक बटुलेको छ भने अमेरिका २२ खेलमा १६ जित र ३२ अंकसहित शीर्ष स्थानमा छ ।